اسلام آباد۔ 21جنوری (اے پی پی) پوسکن آ سال (2019) ء نا اولیکو ملک گیر انسداد پولیو مہم دوشنبے نادے آ بناکرے، مچ آ ملک اٹی 21 آن 25جنوری اسکان برجاسلوک آ دا مہم اٹی 3کروڑ 90 لکھ آن زیات 5سال آن کم وئی نا چناتے پولیو آن بچفنگ نا ویکسین کنفنگک۔ نیشنل ایمر جنسی آپریشنز سینٹر نا کمامدارآتارداٹ مچ آملک اٹی 5سال آن کم وئی نا 3کروڑ 90 لکھ آن زیات چناتے صف اول نا 2لکھ 60 ہزار کارندہ اُرااُراغا ہنسا پولیو نا بچفنگ نا پڑی کنفرہ۔ اوفک پاریر کہ 2018ء ٹی پولیو وائرس نا 12کیس رپورٹ مسوسر ہرافتے ٹی بلوچستان نا ضلع دکی آن مسٹ، خیبر پختونخوا نا ضلع لکی مروت آن اسٹ، کراچی گداپ نا علاقہ غان اسٹ، خیبر آن اسٹ و باجوڑ ایجنسی نا 5 پولیو کیس اوار ءُ، دا حساب وکتاب سالانہ 97 درسد کمتی ءِ پاش کیک ، 2014ء ٹی ہنداوڑنا 306کیس رپورٹ مسوسس۔ کمامدارآک پاریر کہ دسمبر نا تُو اٹی کراچی، پشاور، بنوں ، لاہور، راولپنڈی، قلعہ عبداللہ، پشین و کوئٹہ غان دیر انا سیمپل ہلنگا ہرافتا ٹیسٹ پولیو وائرس کن پازیٹو پیش تمانے۔ وزیراعظم نا فوکل پرسن پولیو تدارک بابر بن عطاء پارے کہ حکومت مچ آ ملک آن پولیو وائرس نا تالان مننگ ءِ شکست تننگ کن پرعزم ءِ و داڑکن کم تالان مننگ نا سیزن ءِ زیات آن زیات کاریم اٹ اتنگ انگ ءِ۔ او پولیو ورکرز آتا کوشست آتا ستاءِ کرے و اومیت ظاہر کرے کہ پوسکن آ سال انا اولیکو مہم نا وخت آ او دالعنت ءِ مدامی کن نجات نا عزم اتون تینا پبی کوشست آتے کاریم اٹ اتیرہ۔ اوپارے کہ نیشنل ایمر جنسی آپریشنز سینٹر نا چاروکی ٹی پاکستان پولیو نا چٹفنگ نا پروگرام نا مچ آ ٹیم ملک گیر کہول آ بڑزکو آب انا مہم نا کمک اٹ داہدف ءِ دوئی کننگ نا کوشست کیک۔ نیشنل ایمرجنسی آپریشنز سینٹر تیاری و یکسینیشن مہم نا ہندی ٹیم تا کمکاری کن 50 آن زیات چاہندار تعینات کننگانے۔ پولیو نا چٹفنگ نا جہانی پروگرام (جی پی ای آئی) نا ٹیکنیکل ایڈوائزری گروپ (ٹی اے جی) ساڑی آ تکنیکی جاچ اٹی پاکستان نا پیش رفت نا جاچ ءِ ہلکونے و مستی گچینی کن سلاہ و سوج تسنے و پارینے کہ دا سلاہ و سوج پروگرام نا اولیت بایدے مرے داسلاہ و سوج آتے ٹی پولیو وائرس نا پک مروک آ علاقہ غاتے ٹی ہرہمو چنااسکان سرمننگ ہرافتسکان پولیو ویکسین سرمتنے و پولیو ورکرز آتا کاریم نا کچ اٹی ودکی اوار ءِ۔ نیشنل سینٹر نا نیشنل کوآرڈنیٹر ڈاکٹر رانا محمد صفدر پارے کہ نن پولیووائرس ءِ شکست تننگ کن غٹ خلاتے پدریسہ پُر کننگ اُن۔ غٹ آن ود دادے کہ لمہ و باوہ تینا چناتے پولیو وائرس آن بچفنگ کن پرعزم ءُ و او وار وار نا پولیو آن بچفنگ نا مہم اٹی ہروار تینا چناتے پولیو ویکسین کنفنگ اٹ کمک کننگ ءُ۔ دا پولیو وائرس نا تالان مننگ ءِ توننگ و چناتے ٹی پولیو وائرس نا جلہو تون جنگ کننگ کن پبی مدافعت ودی کننگ نا جوان ءُ موقع اسے۔
