ساہیوال نا واقعہ غا الس نا غم وغصہ رواءِ، مرتکب بندغ آتے عبرت ناک سزا تننگک، وزیراعظم عمران خان نا ٹویٹ

اسلام آباد۔ 21جنوری (اے پی پی) وزیراعظم عمران خان قوم ءِ باوری ترفینے کہ سانحہ ساہیوال نا مرتکب بندغ آتے عبرت ناک سزاتننگک وخت اس کہ پنجاب پولیس نا مچ آ ڈھانچہ نا اول سرآن جاچ ءِ ہلسا اونا اصلاح نا عمل نا بناءِ کننگک۔ دوشنبے نادے آ تینا ٹویٹ اٹی وزیراعظم عمران خان پارینے کہ ساہیوال نا واقعہ غا الس نا غم و غصہ قابل فہم و رواءِ۔ اوپارے کہ قوم ءِ باوری ایتیوہ کہ قطر انا دورہ غان پدی بننگ آ ڈوہدار آتے نئے بیرہ مثالی سزا ترفیوہ بلکن پنجاب پولیس نا مچ آ ڈھانچہ نا اول سرآن جاچ ءِ ہلینہ و اونا نظام ءِ گچین جوڑ کننگ نا اصلاحات نا عمل نا بناءِ کننگک۔