اسلام آباد۔ 18 جنوری (اے پی پی) بنجائی وزیر ڈٹ بندی، شونداری و اصلاحات و شماریات مخدوم خسرو بختیار پارینے کہ پولیو ءِ پورو چٹفنگ و فالو اپ کننگ کن پین اِراسال نا وخت درکار مریک، دامرض انا چٹفنگ قومی اولیت آتے ٹی اوار ءِ و دانا پورو مون ءِ توننگ کن جامع ڈٹ بندی اس کننگ نا گرج ءِ۔ سی ڈی ڈبلیو پی نا دیوان اٹی وزارت نیشنل ہیلتھ سروسز نا کنڈآن پولیو نا چٹفنگ نا بابت 986 ملین ڈالر نا خڑچ انا نظرثانی مروک ڈٹ اس پیش کرین ہرانا مسخت ملک اٹی پولیو نا چٹفنگ ءِ المی جوڑ کننگ نا ءِ۔ بنجائی وزیر ڈٹ بندی شونداری و اصلاحات خسرو بختیار دا ڈٹ آ گپ و تران کرسا پارے کہ ملک آن پولیو نا چٹفنگ حکومت نا اولیت آتیان اسٹ ءِ۔ بنجائی وزیر پارے کہ دا ڈٹ انا ہم گرنچی و عملدرآمد ءِ المی جوڑ کننگ کن ہروڑاٹ گام گیج کننگے۔ دیوان اٹی ڈٹ ءِ گڈیکو منظوری کن ایکنک آ گدریفنگا۔ یات سلے کہ تدوک آ ہفتہ سی ڈی ڈبلیو پی نا دیوان اٹی دا ڈٹ ءِ عبوری منظوری تننگاسس۔ نظرثانی مروک مسہ سالہ ڈٹ انا خڑچ 347ملین ڈالر ءِ۔
