اسلام آباد۔ 18 جنوری (اے پی پی) بنجائی وزیر دفاعی پیداوار زبیدہ جلال پارینے کہ حکومت کوشست کننگ ءِ کہ جہانی مالیاتی ادارہ (آئی ایم ایف) آ ہنوئی تمپ، داڑان تینا ملک انا الس ءِ بچفن، ضمنی بجٹ اٹی زرکار خلقت آ خراج خلنگ انگ ءِ، حکومت وڈی خوری نا چٹفنگ نا تہیہ کرینے۔ جمعہ نادے آ پارلیمنٹ ہاؤس نا پیشن میڈیا تون گپ و تران کرسا او پارے کہ ہندی صنعت آتا مون آدننگ کن حکومت گام گیج کننگ ءِ۔ ضمنی بجٹ اٹی بیرہ زرکارآتیا خراج خلنگک۔ شیفکو تپہ غا خراج خلنگ پننگ انگ ءِ ، ملک انا معاشی حالت گچین مننگ ءِ۔ معیشت ءِ گچین کننگ کن سخت فیصلہ کروئی تمک ولے حکومت متوسط تپہ نا خیال ءِ تخک۔ پوسکن آ خراج ءِ داوڑنا خلقت آ خلپنہ۔ بنجائی وزیر پارے کہ حکومت یوٹیلٹی بل اٹی بیرہ زرکار خلقت آخراج خلک۔ منسٹرز کالونی ٹی وزیرآتا اسہ اُرا ناگیس بل 45ہزار آن 96 ہزار روپئی بسنے۔ ہرافک گیس ءِ زیات کاریم اٹ اتیرہ او ہمووڑاٹ بل ادا کیرہ۔ زبیدہ جلال پارے کہ حکومت کوشست کیک کہ جہانی مالیاتی ادارہ غا ہنوئی تمپ۔ اونا سخت شرط آتیان وام ہلنگپ داڑان ملک و قوم ءِ بچفن۔بنجائی وزیر پارے کہ حکومت وڈی خوری نا چٹفنگ نا تہیہ کرینے ۔ بروک آ پنچ سال اٹی ملک آن دا ناچوڑ ءِ جوان وڑاٹ چٹفنہ۔
