اسلام آباد۔ 18 جنوری (اے پی پی) وزیراعظم عمران خان پاک چین اقتصادی راہداری نا رداٹ چندی ڈٹ آتا رفتار ءِ ترند کننگ نا گرج آ زور شاغسا پارینے کہ سی پیک ڈٹ آتا زوت پوروی پاکستان نا فائدہ ٹی ءِ ، دافتیان الس کن بھلو راجی و اقتصادی وارخواہی اس ودی مریک وخت اس کہ فیصلہ کننگاکہ سی پیک ایڈوائزری کونسل اس جوڑ کننگک۔ اوداہیت ءِ جمعہ نا دے آ سی پیک ڈٹ آتیا پیش رفت نا جاچ دیوان نا کماشی ءِ کرسا پارے۔ دیوان اٹی صنعتی شونداری، خصوصی اقتصادی زونز، ایم ایل ون ڈٹ، کشاری ، راجی و اقتصادی شونداری ، بنداوی ڈھانچہ و گوادر نا شونداری نا بشخ آتے ٹی پاک۔چین کمکاری آ پیش رفت نا جاچ ءِ ہلنگا۔ وزیراعظم پارے کہ پاکستان تینا الس ءِ غریبی نا دُوآن کشنگ کن چین نا آزموندہ غان بھاز زیات فائدہ ہرفنگ کیک۔ اوپارے کہ صنعتی وکشاری بشخ آتے ٹی پاک۔چین کمکاری ملک انا دا بشخ آتے ٹی لائخی ءِ علم دروشم اس تننگ اٹ کمکار جوڑ مننگ کیک۔ وزیراعظم چیئرمین زرکاری بورڈ ءِ پارت کرے کہ خصوصی اقتصادی زون تا زوت شونداری نا بارواٹ جامع سلاہ و سوج چار ہفتہ نا تہٹی پیش کننگے۔ دیوان اٹی فیصلہ کننگا کہ سی پیک ایڈوائزری کونسل اس جوڑ کننگک۔ دیوان اٹی پاننگاکہ سی پیک نا ارٹ میکو مرحلہ ٹی صنعتی کمکاری آ چکار کننگک۔ وزیراعظم چیئرمین زرکاری بورڈ ءِ پارت کرے کہ دا اہم انگا مرحلہ غا مون آ برسا کڑد ادا کے انتئے کہ چین آن بھاز بھلو نجی زرکاری اسے نا گمان ءِ۔
