اسلام آباد۔ 17 جنوری (اے پی پی) وزیر مملکت پارلیمانی امور علی محمد خان پارینے کہ صوبہ خیبر پختونخوا نا مسکوہی ایس ایس پی پشاور طاہر داوڑ ایماندار نا شہیدی قومی ءُ سانحہ اسے ، ہراوخت اسکان خونی تے دزگیر کننگ تنے ہمووخت اسکان ننا ادارہ غاک آرام اٹ تولپسہ، پاک فوج ، پولیس تون اوار سیکورٹی ادارہ و سویلین بندغ آتا بے مٹ قربانی تا سوب آن دہشت گردی نا مخ پنانے۔ پنچ شنبے نادے آ قومی اسمبلی ٹی چوہدری برجیس طاہر نا ایماندار طاہر داوڑ نا برمتہ و خون نا جاست وپاست نا بابت سوج انا ورندی ٹی وزیر مملکت علی محمد خان پارے کہ طاہر داوڑ نا قومی ہیروءِ۔ دہشت گردی نا جنگ اٹی پولیس، فوج اتون اوار ایلو سیکورٹی ادارہ و سویلین بندغ آتا جان تا نذرانہ تسن۔ 60 آن 70 ہزار شہید آتا قربانی تیان دہشت گردی نا مخ پنانے۔ فوج و ادارہ غاک غٹ حکومت نا بشخ آک مریرہ۔ طاہر داوڑ نا جان ناازالہ تو ممکن اف۔ جاست وپاست برجاءِ۔ دشمن پدریسہ ننا برخلاف حرکت اٹی ءِ۔ کے پی کے نا بندغ آک بے اُرا مسر۔ طاہر داوڑ نا شہیدی قومی ءُ سانحہ اسے۔ دابابت ہراتم سرجم آک مون آ بریر ایوان ءِ معلومدار کننگک۔ رانا ثناء اللہ نا ضمنی سوج انا ورندی ٹی وزیر مملکت علی محمد خان پارے کہ آئی ایس آئی ہند ن ءُ ادارہ اسے ہرادے دنیا منک۔ پاکستان داوخت آ جنگ اناحالیت اٹی ءِ۔ مستین بیدس ویزہ غان بھارت نا خلقت مری و اسلام آبا د آ برسا کریر۔جاگہ نا جاگہ اس نزوری سلنگ انسانی جبلت ءِ۔ ننا ادارہ غاتا گڑاس بندغ آک ہندن ءُ ہرافک ننا چناتا رکھ اکن تینا جان تے ندر کرینو۔
