بلاک شناختی کارڈ آتے ملنگ نا بابت نظام ءِ آسان جوڑ کننگے، اسپیکر قومی اسمبلی اسد قیصر نا وزارت داخلہ ءِ پرمان

اسلام آباد۔ 17 جنوری (اے پی پی) اسپیکر قومی اسمبلی اسد قیصر وزارت داخلہ ءِ پرمان کرینے کہ بلاک شناختی کارڈ آتے ملنگ نا بابت نظام ءِ آسان جوڑ کننگے تانکہ کے پی کے تون اوار مچ آ ملک انا الس نا مشکل آتا ازالہ ءِ کننگ مرے۔ پنچ شنبے نادے آ قومی اسمبلی ٹی وقفہ سوج آتے ٹی محمد بشیر خان نا سوج آ وزیر مملکت ایوان ءِ پارے کہ گدینگوک آ منہ وخت آن جعلی شناختی کارڈ آتا ویل مسنے ۔ داسہ سسٹم ءِ اپ گریڈ کننگانے۔ معاملہ ءِ ایسر کننگ اٹ وخت لگک۔ ہراوخت آن شہریار آفریدی چارج ءِ سنبھالانے تو معاملہ غاتے ٹی گچینی بسنے۔ داویل اسہ اِرا دے اٹی ایسر مفک ، داڑآ وخت لگک۔ اوپارے کہ داویل انا جاچ ءِ ہلنگ انگ ءِ۔ فصیح اللہ نا ضمنی سوج آ وزیر مملکت پارے کہ لوئر دیر اٹی 1459 کارڈ بلاک مسوسر ہرافتے ٹی 1426پاکستان تا ہلورہ ہرافتے بلاک کننگا وخت اس کہ 33 عدم حاضری نا سوب آن بلاک ءُ۔ اوپارے کہ شہریار آفریدی تون دا معاملہ ءِ اولیتی بنداو تیا چست کننگک ہراڑا اسپیکر رولنگ ترسا پارے کہ دا اسہ اہم ءُ ویل اسے۔ بلاک شناختی کارڈ آتے ملنگ نا نظام ءِ سادہ و آسان بایدے جوڑ کننگے تانکہ خلقت نا ویل آک ایسر مریر۔ نصیبہ چنا نا سوج آ وزیر مملکت ایوان ءِ پارے کہ مچ آ ملک اٹی پاسپورٹ نا 162دفتر کاریم کننگ ءُ۔ پوسکن آ آفس تا ملنگ نا بابت داسکان ہچ ءُ ڈٹ اسے آ سجفنگ افن ، ولے باسک اسے نا کنڈآن پیدواری یا گرج مننگ آ دا بابت کاریم مننگ کیک۔ اوپارے کہ ہندن ءُ علاقہ ہراکان زیات کچ اٹی خلقت مزوری کن ملک آن پیشن ہِننگ ءُ او علاقہ غاتیٹی پاسپورٹ فیس ءِ کم کننگ آ کاریم مننگ ءِ۔ مہیش کمارنا سوج آ وزیر مملکت پارے کہ تھر پار کر اٹی پاسپورٹ آفس ءِ بند کننگ انگ اف، دامعاملہ غا شہریار آفریدی تون ہم ہیت کننگک و اوڑتون معاملہ ءِ چست کننگک۔ ڈاکٹر نفیسہ شاہ نا ضمنی سوج آ وزیر مملکت ایوان ءِ پارے کہ زالبول نا شناختی کارڈ آتا بابت سرجم آتے نادراغان ہلسا ایوان ءِ معلومدار کننگک۔