وزیراعظم عمران خان بروک آ تُو حیدر آباد یونیورسٹی نا بنداو ءِ تخک
اسلام آباد۔ 16جنوری (اے پی پی) وزیراعظم عمران خان بروک آ تُو حیدر آباد یونیورسٹی نا بنداو ءِ تخک وخت اس کہ کراچی سرکلر ریلوے نا بحالی و پوروی ٹی مون تروک ویل آتے اولیتی بنداو تیا ایسر کننگک۔ داہیت انا درشانی ءِ وزیراعظم عمران خان نا ایم کیو ایم نا قومی اسمبلی نا باسک آتون گپ و تران اٹی کننگا ہرافک چارشنبے نادے آ داڑے وزیراعظم آفس اٹی اوڑتون اوڑدہی کریر۔ اوڑدہی ٹی وزیر انفارمیشن ٹیکنالوجی خالد مقبول صدیقی، وزیر کانود ڈاکٹر فروغ نسیم و قومی اسمبلی نا باسک سید امین الحق ئسک ساڑی ئسر۔ وزیر خزانہ اسد عمر، خصوصی کمکار نعیم الحق ، باسک قومی اسمبلی ملک محمد عامر ڈوگر ئسک ہم داوخت آ ساڑی ئسر۔ اوڑدہی ٹی صوبہ سندھ و کراچی حیدر آباد کون آ بھلا شار تا شاری تے مون تروک ویل آتا بابت گپ و تران کننگا۔ ہڑتوم آ جماعت آتا نیام اٹ سیوتی معاملہ غاتیا ہم گپ و تران مس۔ داوخت آ وزیراعظم پارے کہ سندھ انا الس ءِ مون تروک ویل آتا سماءِ، داویل آتا ایسر کننگ کن بنجائی حکومت تینا کڑد ءِ ادا کیک۔ شونداری ڈٹ آتا بابت صوبائی کہول آ ہڑتوم آ جماعت آتا نیام اٹ کوآرڈینیشن ءِ پین گچین جوڑ کننگ کن گورنر سندھ عمران اسماعیل نا سرکڑدہ ہی ٹی کمیٹی اس ٹہیفنگ نا فیصلہ کننگا وخت اس کہ وزیراعظم بروک آ تُو حیدر آباد یونیورسٹی نا بنداو ءِ تخک۔
