کوئٹہ۔ 16جنوری (اے پی پی) وزیراعلیٰ بلوچستان جام کمال خان تون چینی کمپنی چائنا کنسٹرکشن اینڈ انجینئرنگ کارپوریشن نا پاکستان اٹی ڈائریکٹر مسٹر جاؤ فان (Mr. Gao Fan) چارشنبے نادے آ داڑے اوڑدہی کرے ہراٹی سی پیک نا رداٹ بلوچستان اٹی تعمیرات ، بنداوی ڈھانچہ، مواصلات و صنعتی بشخ اٹی شریداری نا بنداو آ شونداری ڈٹ آتے ٹی کمکاری ءِ مون آ دننگ آ گپ و تران کننگا، صوبائی وزیر آک و اسمبلی نا باسک آک ہم داوخت آ ساڑی ئسر۔ چینی کمپنی نا ڈائریکٹر سی پیک ڈٹ اٹی بلوچستان نا اہمیت آن امنا کرسا چندی بشخ آتے ٹی ڈٹ بنا کننگ اٹ است خواہی نا درشانی ءِ کرے و پارے کہ اونا کمپنی سی پیک اٹی اوار ایسٹرن کوریڈور نا ایم 5سیکشن نا جوڑ کننگ نا کاریم ءِ کننگ ءِ ہرا پوروی نا مرحلہ غاتے ٹی ءِ ، اوسی پیک نا سلاہ ئی ڈٹ نوکنڈی، ماشکیل ، پنجگور شاہراہ غا کاریم کننگ اٹ است خواہی ظاہر کرے و پارے کہ ڈٹ آ چین نا سوفٹ لون یابی اوٹی نا بنداو آ کاریم نا بناءِ کننگ مریک، اوپارے کہ اونا کمپنی گوادر ماسٹر پلان نا رداٹ گوادر اٹی بنداوی ڈھانچہ نا فراوانی نا ڈٹ آتیا ہم کاریم کننگ اٹ است خواہی تخک، داوخت آ ہیت وگپ کرسا وزیراعلیٰ پارے کہ صوبائی حکومت بلوچستان نا فائدہ نار داٹ چندی بشخ آتے ٹی شریداری نا رداٹ ڈٹ بنا کننگ نا ستاءِ کیک، خاص وڑاٹ سی پیک نا سلاہ ئی دیکی راہداری، بلوچستان نا حکومت و الس کن بے پناہ اہمیت تخک و وزیراعظم دا ڈٹ آ کاریم نا بناءِ کننگ و ژوب آن کراچی اِرارویہ شاہراہ نا جوڑ کننگ نایخین دہانی کرفینے۔ وزیراعلیٰ چینی کمپنی ءِ نوکنڈی ، ماشکیل ، پنجگور شاہراہ و منرل کوریڈور آن بیدس بوستان، چمن، کوئٹہ، حب و گوادر اٹی انڈسٹریل و ایکسپورٹ پروسیسنگ زون تا جوڑ کننگ نا ڈٹ آتیا کاریم کننگ نا سلہ خلک، چینی کمپنی نا ڈائریکٹر پارے کہ زوت اونا کمپنی نا چاہندار آک بلوچستان نا دورہ ءِ کرسا سلاہ ئی ڈٹ آتا سٹڈی ءِ کیرہ و فزیبلٹی رپورٹ اس تیار کننگک، چینی کمپنی نا ڈائریکٹر داوخت آ وزیراعلیٰ ءِ چیئرمین ماؤنا مجسمہ اس پیش کرے۔
