اسلام آباد۔ 16جنوری (اے پی پی) وزیراعظم عمران خان تاریخی و دودوربیدگی میرات و مذہبی سیل و سوات نا حامل ماڑی تا نقشہ سازی(میپنگ ) ءِ زوت پورو کننگ نا پارت کرسا پارینے کہ تاریخی و دودوربیدگی میرات نا حامل ماڑی تا اصل مالک الس ءِ ، سرکاری ماڑی تا جوان وڑاٹ کاریم اٹ اتنگ تون اوار اوار اوفتا رکھ ءِ المی جوڑ کننگ کن سوچ ءِ بدل کننگ نا گرج ءِ۔ اوداہیت ءِ چارشنبے نادے آ دودوربیدگی میرات نا حامل سرکاری ماڑی تا دُوارہ کاریم اٹ اتنگ نا قومی نگران کمیٹی نا دیوان نا کماشی ءِ کرسا پارے۔ دیوان اٹی وزیراعظم ہاؤس، صوبہ غاتے ٹی گورنر ہاؤس ، کراچی و لاہور اٹی اسٹیٹ گیسٹ ہاؤس ، قصر ناز و ملک انا چندی بشخ آتے ٹی واقع ایلو ماڑی تتون اوار سرکاری ماڑی تا جوان وڑاٹ کاریم اٹ اتنگ آ پیش رفت نا جاچ ءِ ہلنگا۔ داوخت آ وزیراعظم پارے کہ اونا اِرا مسخت ءُ ، اولیکو مسخت تاریخی اہمیت تخوک ہمو ماڑی تسکان الس ءِ رسینگ تروئی ءِ ، ہرااوفتا اصل مالک آک ءُ و ارٹ میکو مسخت نظام اس جوڑ کرسا دا تاریخی ماڑی تا رکھ ءِ کروئی ءِ تانکہ اوفتا خیال داری و جوڑ جاڑ کن اوفتیان ریونیو جمع کننگ مرے و خراج تروک آتا پیسہ غاتے اوفتا جوڑ جاڑ نا مسخت آتے کاریم اٹ اتنگپ۔ وزیراعظم سوچ اٹی بدلی اتنگ آ زور شاغا ہراڑان پبلک ماڑی تا جوان وڑاٹ کاریم اٹ اتنگ تون اوار اوار اوفتا رکھ ءِ المی جوڑ کننگ مرے۔ وزیراعظم تاریخی و دودوربید گی اہمیت و مذہبی سیل و سوات نا حامل ماڑی تا نقشہ سازی(میپنگ) ءِ زوت پورو کننگ نا پارت کرینے۔ اوپارے کہ تاریخی اہمیت نا ماڑیک، مذہبی جاگہ غا ک و ایلو سیل و سواتی جاگہ غاتیا واقع ماڑیک مچ آ ملک اٹی تالان ءُ و بھاز زیات سیل و سواتی وارخواہی نا حامل ءُ ہرافتے دنیا نا مون آ درستی راستی کرفنگ نا گرج ءِ۔
