اسلام آباد۔ 16جنوری (اے پی پی) بنجائی وزیر مواصلات مراد سعید پارینے کہ سعودی عرب اٹی پاکستانی مزور آتے مون تروک مشکل و ویل آتا چٹفنگ کن گام گیج کننگ انگ ءِ۔ چارشنبے نادے آ قومی اسمبلی ٹی شیراکبر خان نا کنڈآن سعودی عرب اٹی پاکستانی مزور آتے مون تروک ویل آتا بابت اعتراضی ٹک انا ورندی ءِ ترسا بنجائی وزیر پارے کہ پاکستانی مزور آتا مشکل آتا ازالہ کن کمیونٹی ویلفیئر اتاشی تا کچ اٹی ودکی نا سلاہ ءِ کابینہ منظور کرینے۔ سعودی عرب و ایلو ملک آتے ٹی رہینگوک آ پاکستانی تا مشکل آتا ایسری کن کال سر زمین نا پن اٹ سروس اس ہم بناکرینے۔ وزیراعظم تینٹ اوورسیز پاکستانی تا ویل آتا ایسری کن پروگرام نا بناءِ کرینے۔ اوپارے کہ سعودی عرب اٹی پاکستانی مزور آتے اقامہ ریلیز کپننگ نا مشکل آتیا کاریم مننگ ءِ۔ انشاء اللہ دا ویل ءِ آخبتی بنداو تیا ایسر کننگک۔ نن وٹس ایپ نمبر آن خلقت تون رابطہ ٹی اُن۔ مائزہ حمید نا اعتراضی ٹک آ ورندی ترسا اوپارے کہ سویلی پنجاب نا بابت ساڑی آ حکومت وعدہ کتو بلکن عملی گام گیج کرینے۔ بہاولپور اٹی صوبائی کابینہ نا باقاعدہ دیوان مریک۔ سویلی پنجاب اٹی چناتتون جبری مشقت نا چٹفنگ و سیل و سوات و تعلیم نا ویل آتا ایسری نا بابت جامع گام گیج مننگ ءِ۔ اوپارے کہ مسلم لیگ ن داسہ پیپلزپارٹی نا ترجمان جوڑ مسنے۔ چِکنگ آن خمب ہلنگ اسکان نا سفر آ ای اوفتے مبارکبادی ایتیوہ۔
