اسلام آباد۔ 16جنوری (اے پی پی) وزیر خارجہ شاہ محمود قریشی پارینے کہ پٹاٹہ نا نہاد اٹی کمتی حکومت آتا پیدوار کروک اُس اف بلکن دا جہانی کہول آ پٹاٹہ نا پیدوار اٹی بے کچ ودکی نا سوب آن مسنے، دا ویل ءِ غٹ صوبائی حکومت آک، کشارگر آتا نمائندہ و پارلیمنٹ نا باسک آتون اوار غٹ کڑدہ غاتون اواری اٹ تولسا ایسر کننگ کن پبی کوشست کننگک۔ چارشنبے نادے آ قومی اسمبلی ٹی اعتراضی ٹک آ راؤمحمد اجمل خان پارے کہ تدوک آدے پنجاب اسمبلی نا مون آ ہزار آ بندغ آک مچ مسر۔ پٹاٹہ نا فی ایکڑ پیدوار آ 72 ہزار خڑچ بریک و دانا بہا32ہزار اٹی مننگ ءِ۔ حکومت ءِ کشارگر آتا دا ویل اکن بایدے ایسر اس کشوئی مرے۔ زمیندار آک تباہی نا کنڈا ہِننگ ءُ۔ ننے بزغر آتے کن بایدے توار بڑزکروئی مرے۔ اونا ورندی ٹی وزیر خارجہ شاہ محمود قریشی پارے کہ پٹاٹہ نا نہاد اٹی کمتی ٹی پیشن نا دوک اریر، بھارت اٹی پٹاٹہ اسہ روپئی فی کلو بہا مننگ ءِ۔ دنیا ٹی پٹاٹہ نا بمپر فصل انا سوب آن دا مسنے۔ اوپارے کہ پٹاٹہ نا فصل آ فی ایکڑ کشاری مداخل آ بھلو خڑچ اس بسنے۔ دانا ایسری دادے کہ ننے دا بابت مسہ صوبائی حکومت آتون رابطہ کروئی تمک انتئے کہ ہژدہ می ترمیم آن پد دا بشخ ءِ صوبہ غاتے تننگانے۔ پٹاٹہ نا برآمد وزارت واپار نا زمواری ءِ ولے داٹی جہانی نہاد ءِ مون آ تخوئی مریک۔ دا بیرہ اسہ جماعت اسے نا ویل اف، کشار گر آتا آخبت، روزگار و اوفتا شرحالی نا ویل ءِ۔ روا سلاہ تے مون آ اتنگے۔ اواری اٹ تولسا ویل ءِ ایسر کننگ کن کوشست کننگک۔ غٹ کڑدہ غاتے اواری اٹ دا ویل آ لائحہ عمل اس جوڑ کننگے۔ پٹاٹہ نا نہاد نا معاملہ حکومت آتا پیدوار کروک اُس اف دا طلب و رسد نا معاملہ ءِ۔
