اسلام آباد۔ 16جنوری (اے پی پی) بنجائی وزیر ہوابازی ڈویژن محمد میاں سومرو پارینے کہ پی آئی اے نا واپاری حکمت عملی نا چار سالہ ڈٹ مارچ یا اپریل اٹی بنجائی حکومت ءِ پیش کننگک، ادارہ آن کارکڑدگی ءِ گچین جوڑ کننگ کن 200 فالتو و گھوسٹ ملازم آتے کشنگانے، جدہ و مدینہ کون آ کٹیا کروک کسر تیا کچ ءِ ودفنگ، سیالکوٹ۔پیرس ، بارسلونا ، پشاور۔شارجہ ، پشاور ۔العین ، ملتان ۔شارجہ کن جہاز آتے ہندا یا بروک آ تُو اٹی بناکننگک۔ چارشنبے نادے آ قومی اسمبلی ٹی وقفہ سوج آتے ٹی مسرت رفیق مہیسڑ نا سوج انا ورندی ٹی محمد میاں سومرو پارے کہ پی آئی اے نسخان تے سگنگ کپک۔ شاہدہ رحمانی نا سوج انا ورندی ٹی اوپارے کہ نسخان اٹی چلینگوک آ علاقہ غاتے ٹی جہاز چلیفنگ نا فی الحال ہچ ءُ پروگرام اس اف۔ محمد ہاشم نا سوج انا ورندی ٹی محمد میاں سومرو پارے کہ کراچی آن دالبندین کن پی آئی اے نا جہاز محدود مارکیٹ طلب نا سوب جہاز آتے ہفتہ ٹی اسہ وار کننگانے۔ ولے پی آئی اے مارکیٹ ٹک، ٹریفک و رجحان و داکسر نا فائدہ غاتیا پدریسہ نظر شاغانے و دالبندین کراچی نا نیام اٹ جہاز آتے واپاری قدر و مارکیٹ طلب نا بنداو تیا ودفنگ کن المی گام گیج کیک۔ او پارے کہ ایئر فورس دا دا ادارہ ءِ جوڑ کننگ اٹ کمک و مدت کرے۔
