اسلام آباد۔ 16جنوری (اے پی پی) بنجائی وزیر خزانہ اسد عمر پارینے کہ چین نا بی آر آئی پروگرام نا رداٹ چین پاکستان اقتصادی راہداری ڈٹ انا پوروی و ودکی آن دا ڈیہہ 21می صدی نا جہانی معیشت نا وت مریک ، پاکستان نا سنگت ملک آک مشکل وخت اٹی تفینو۔ داآخریکو وار ءِ کہ پاکستان کمک خواہسونے۔ او چارشنبے نادے آ برکی انسٹیٹیو ٹ آف پبلک پالیسی (بی آئی پی پی) نا کنڈآن سالانہ رپورٹ ءِ جاری کننگ نا دود آن تران کریکہ۔ اوپارے کہ چین و پاکستان نا تعلقداریک روایتی تعلقداری تیا ن ودءُ۔ چین پاکستان تون مدام تفینے و ساڑی آ مشکل وخت اٹی ہم سعودی عرب آنبار چین کمک کرینے۔ اوپارے کہ متحدہ عرب امارات و ایلو سنگت ملک آتون غٹ ءِ باوری ترفیوہ کہ دا آخیریکو وار ءِ کہ پاکستان کمک ہلکونے۔ داویل آتا مون ءِ توننگ کن اسہ وژن و گرینڈ پلان نا گرج ئس و نن دا چرجوئی ٹی سنجیدہ کوشست کننگ اُن۔ وزیر خزانہ پارے کہ چین پاکستان اقتصادی راہداری بی آر آئی پروگرام نا بھاز اہم ءُ بشخ اسے۔ سی پیک پاکستان و چین نا ہڑتوم آ کنڈآتا شریکی ڈٹ ءِ ولے ہڑتوم آ ملک آتا سرکڑدہ غاک سی پیک نا رداٹ انفرادی ڈٹ آتے ٹی مسٹ میکو ملک ءِ اوار کننگ نا سلہ خلنگ آ امنا کرینو۔ اوپارے کہ دانا بنداوی مسخت ڈٹ ءِ علاقائی کہول آ ودفوئی ءِ۔ ہرانا رداٹ قطب آن سویل اتون اوار اوار دیکی نا سمت ہم رابطہ کاری ءِ مون آ دننگ مریک۔ اوپارے کہ ننا خیال اٹی اگہ بھارت اٹی ہم ہندن ءُ سرکڑدہ اس برے ہرانا وژن بھلن مرے و دمدستی فائدہ آن مون آہنسا سجفنگ کے تو دا رابطہ کاری دے ٹک نا سمت ہم ودفنگ مریک۔ اسد عمر پارے کہ سی پیک پاکستان و مچ آڈیہہ کن اہم ءُ ڈٹ اسے ہرانا پوروی و ودفنگ آن دا ڈیہہ 21صدی ٹی جہانی معیشت نا وت جوڑ مننگ کیک ۔ اوپارے کہ پاکستان داڈٹ آن بیرہ فائدہ کروک آ ملک مفک بلکن دانا کمک اٹ علاقائی معیشت اٹی ہم کڑد ادا کننگ نا خواہندار ءِ۔
