اسلام آباد۔ 15جنوری (اے پی پی) وزیراعظم عمران خان پارینے کہ پاکستان اوغانستان نا جھیڑہ نا سیاسی ایسری نا پورو مخ تفی ءِ کیک ہرا دا جھیڑہ ءِ چٹفنگ نا اسٹ انگا قابل عمل ایسری ءِ۔ اوداہیت ءِ پاکستان اٹی امریکہ نا مسکوہی سفیر کیمرون منٹر تون وزیراعظم آفس اٹی اوڑدہی ٹی گپ و تران کرسا پارے۔ کیمرون منٹر 2010 ء آن ہلیس 2012 ء اسکان پاکستان اٹی امریکہ نا سفیر مسنے۔ وزیراعظم پارے کہ اونا حکومت نا اقتصادی ایجنڈا ءِ عملی دروشم اس تننگ کن ڈیہہ ٹی امن و سلامتی نا چاگڑد المی ءِ۔ مسکوہی امریکی سفیر نا ستاءِ کرسا وزیراعظم تین پہ تینی فائدہ و پت آ مبنی سوگو پاک امریکہ تعلقداری نا اہمیت نا اعادہ ءِ کرے۔ وزیراعظم مسکوہی امریکی سفیر ءِ راجی و اقتصادی شونداری و وسیلہ غاتا منصفانہ بشخ وپانٹ نا کمک اٹ پاکستانی شاری تا زند اٹی بامعنی بدلی اس اتنگ نا رداٹ تینا حکومت نا اولیت آتیان معلومدار کرے۔ کیمرون منٹر مستین اٹی پاکستان اٹی اڈ کننگ ءِ تینا سفارت کاری نا کیریئر اٹی قابل ذکر آزموندہ گوندا۔ اووزیراعظم ءِ پارے کہ مسکوہی سفارت کار و داسہ پنی آ تھینک ٹینک ایسٹ ویسٹ انسٹی ٹیوٹ نا صدر نا حیثیت اٹ او پاکستان و امریکہ نا نیام اٹ سوگو تعلقداری تا مخ تفی و تلقین ءِ کیک۔ اوپارے کہ پاکستان ڈیہہ و امریکہ نا قومی سلامتی ہدف آتا بت آن اہم ءُ ملک اسے۔
