بنجائی وزیر ڈٹ بندی، شونداری و اصلاحات مخدوم خسرو بختیار نا چینی سفیر یاؤ جنگ اتون گپ و تران

اسلام آباد۔ 15جنوری (اے پی پی) بنجائی وزیر ڈٹ بندی ، شونداری و اصلاحات مخدوم خسرو بختیار پارینے کہ وزارت ڈٹ بندی چینی زرکار آتے ہروڑ اٹ آسراتی تننگ کن گام گیج کیک، کشت و کشار نا بشخ اٹی جائنٹ وینچرز و بزنس ٹو بزنس رابطہ غاتے مون آ دننگ انگ ءِ، 8می جے سی سی نا وخت آ دستخط مروک آ مفاہمتی یات داشت آن سی پیک صنعتی کمکاری ءِ مون آ دننگک۔ داخیال آتا درشانی ءِ او سے شنبے نادے آ پلاننگ کمیشن اٹی چینی سفیر یاؤ جنگ اتون اوڑدہی ٹی کرے۔ اوڑدہی ٹی ہڑتوم آ کنڈآتا تعلقداری و سی پیک نا چندی ڈٹ آتیا پیش رفت نا جاچ ءِ ہلنگا۔ چینی سفیر 8می سی پیک جے سی سی نا سرسہب اڈتننگ آ خراج تحسین پیش کرے۔ اوڑدہی ٹی سی پیک نا رداٹ جائنٹ وینچرز و پاکستانی برآمد آتے ودفنگ کن گام گیج آتے برجاتخنگ آ امنا کننگا۔ سال 2019 ء ءِ صنعتی ، راجی و معاشی و کشاری کمکاری نا سال گوندا۔ اوڑدہی ٹی گوادر ایئر پورٹ و ایلو راجی ڈٹ آتا مسہ تُو اٹی بنداو ءِ تخنگ آ امنا کننگا۔ دا وخت آ بنجائی وزیر پارے کہ 8می جے سی سی نا وخت آ دستخط مروک آ مفاہمتی یات داشت آن سی پیک صنعتی کمکاری ءِ مون آ دننگک۔ بنجائی وزیر مخدوم خسرو بختیار پارے کہ ٹیکسٹائل ، پیٹرو کیمیکلز و آئرن اینڈ اسٹیل نا بشخ اٹی چینی زرکاری ءِ اتنگ کن گام گیج آک برجاءُ۔ وزارت ڈٹ بندی چینی زرکار آتے ہروڑنا آسراتی تننگ کن گام گیج کیک، پاکستان اٹی کاروبار کن آسانی تننگ کن پالیسی اصلاحات نا عمل برجاءِ۔ بنجائی وزیر پارے کہ راجی و معاشی بشخ اٹی کمکاری نا اجراء جے سی سی نا اہم ءُ سرسہبی اسے۔ راجی بشخ انا ڈٹ آتیان ملک انا پسماندہ علاقہ غاتے ٹی شونداری نا عمل بناکیک، کشت وکشار، تعلیم ، جان جوڑی ، غریبی نا چٹفنگ، آبنوشی و فنی تربیت نا ڈٹ آتے زوت آن زوت عملی جوڑ کننگ انگ ءِ، کشاری کمکار جائنٹ ورکنگ گروپ نا قیام سی پیک ءِ کشاری بشخ اسکان ودفک۔ بنجائی وزیر پارے کہ چینی زرکار آتے کشت وکشار و فوڈ پروڈکشن ، پروسیسنگ ، لاجسٹک و مارکیٹنگ اٹی بھلا وارخواہی تیان بایدے فائدہ ہرفوئی مرے۔ کشت و کشار نا بشخ اٹی جائنٹ وینچرز و بزنس ٹو بزنس رابطہ غاتے مون آ دننگ انگ ءِ۔ داوخت آ چینی سفیر پارے کہ جے سی سی نا توسط اٹ ہدف آتا دوئی کننگ و سی پیک ءِ ودفنگ نا عمل مننگ کرینے، زرکار آتے کن پاکستانی حکومت نا کوشست آک ستاکڑزرہ، چینی سفیر پارے کہ بھلو کچ اسے ٹی چینی زرکار آک زوت پاکستان نا دورہ ءِ کننگ ءُ ہراڑان ہڑتوم آ کنڈآتا معاشی کمکاری پین سوگو مریک۔