چیئرمین سینیٹ محمد صادق سنجرانی نا تبوک نا گورنر شہزادہ فہد بن سلطان بن عبدالعزیز تون گپ و تران

اسلام آباد۔ 15جنوری (اے پی پی) چیئرمین سینیٹ محمد صادق سنجرانی پارینے کہ پاکستان سعودی عرب تون تینا متکن آ تعلقداری و ہڑتوم آ کنڈاتا کمکاری ءِ بے کچ قدر انا نظر اٹ ہرک و ننا خواہش ءِ کہ اقتصادی و واپاری کہول آ ہڑتوم آ کنڈآتا کمکاری ءِ پین ودفنگے۔ اوداخیال آتا درشانی ءِ داڑے تبوک نا گورنر شہزادہ فہد بن سلطان بن عبدالعزیزتون اوڑدہی ٹی کرے۔ اوپارے کہ پائیدار امن و دیر پا شونداری کن المی ءِ کہ ویل آتا ایسری کن ڈائیلاگ نا کسر ءِ اختیار کننگے و اواری اٹ ویل آتا ایسری کن کوشست کننگے۔ چیئرمین سینیٹ داوخت آ تینا دورہ سعودی عرب نا ذکر ءِ ہم کرے و پارے کہ ہڑتوم آ ملک آتے ٹی ڈل آتا ہن و بر تے ٹی ترندی اتنگ نا گرج ءِ تانکہ کمکاری کن پوسکن آ کسر تے آآوار کننگ مرے۔ اوپارے کہ سعودی عرب اٹی سینیٹ نا ڈل ءِ مثالی مہمان نوازی تننگا ہراکہ داہیت انا شاہدی ءِ کہ ہڑتوم آ ملک آک اسہ ایلو تون رابطہ غاتے پین سوگو کننگ نا خواہندار ءُ۔ اواقتصادی و واپاری کہول آ کمکاری کن پوسکن ءُ کسر آوار کننگ آہم زور شاغا۔ اوپارے کہ پاکستان اٹی سعودی زرکاری کن بھلو وارخواہی اس ارے و ہڑتوم آ ملک آک زرکاری کن سازگار چاگڑد فراوان کیرہ ولے گرج داہیت انا ءِ کہ زرکارآتے خڑک اتنگے و تین پہ تینی است خواہی نا ڈٹ آتے ٹی زرکاری نا کمک اٹ رابطہ غاتے پوسکن آ بڑزی تیا دننگے۔ تبوک نا گورنر چیئرمین سینیٹ نا خیال آتا ستاءِ کرسا اقتصادی واپاری و معاشی رابطہ غاتے پین سوگو کننگ آ امنا کرے۔