اسلا م آباد۔ 14جنوری (اے پی پی) صدر مملکت ڈاکٹر عارف علوی پارینے کہ پاکستان سعودی عرب تون تینا تعلقداری تے بھاز زیات قدر انا نظر اٹ ہرک و غٹ بشخ آتے ٹی دا تعلقداری تے پین مون آ دننگ نا خواہندار ءِ۔ اوداہیت ءِ گورنر تبوک شہزادہ فہد بن سلطان بن عبدالعزیز السعود تون گپ وتران کرسا پارے ہرا دوشنبے نادے آ داڑے ایوان صدر اٹ اوڑتون اوڑدہی کرے۔ صدر داہیت آ زور شاغا کہ سرکڑدہ نا کہول آ ساڑی آ اوڑدہی تیان ہڑتوم آ ملک آتا نیام اٹ تعلقداریک پین سوگو مریرہ۔ اوواپاری و زرکاری تعلقداری تے ترند کننگ آ است جمی نا درشانی ءِ کرسا داہیت آ زور شاغا کہ پاکستان حرمین شریفین نا رکھ اکن بدستور پرعزم ءِ۔ اوپارے کہ پاکستانی پردیسیک سعودی عرب نا شونداری و شونہالی ٹی بھلو خذمت اس انجام تننگ ءُ ، پاکستانی برادری وژن 2030 ء ڈٹ آتے ٹی اہم کڑدادا کننگ کیرہ۔ گورنر تبوک پارے کہ سعودی عرب نا الس و حکومت پاکستان نا حکومت و الس نا بھاز شرف ءِ کیرہ۔ اوپارے کہ سوگو برادرانہ تعلقداری تا بنداوی سوب السی کہول آ خڑکی رابطہ و پاکستانی برادری نا سعودی عرب نا شونداری و شونہالی ٹی خذمت و کڑد ءِ۔ اواومیت ظاہر کرے کہ ہڑتوم آ ملک آتا نیام اٹ ساڑی آ برادرانہ تعلقداری آخبت اٹ پین مون آ کاہک۔
