اسلام آباد۔ 14جنوری (اے پی پی) وزیراعظم عمران خان پارینے کہ ساڑی حکومت ملک انا حالت ءِ بدلیفنگ کن تینا منشور نا رداٹ ڈھانچہ جاتی اصلاحات آتیا عمل کننگ ءِ ، قوم تا زند اٹی ڈھانچہ جاتی اصلاحات ہمیشہ تکلیف تروک ءُ مرحلہ اس مریک ولے اوکان پد جوان و شونہا ل دور اس بناکیک، وزارت اطلاعات حکومت نا اصلاحاتی ایجنڈا و اونا مسخت آتے تالان کننگ اٹ تینا کڑ د ءِ ادا کے۔ اوداہیت ءِ دوشنبے نادے آ داڑے وزارت اطلاعات نا چندی محکمہ غاتا سرکڑدہ غاتون اوڑدہی ٹی گپ و تران کرسا پارے۔ اوڑدہی ٹی وزیر اطلاعات چوہدری فواد حسین ، خصوصی کمکار افتخار درانی و یوسف بیگ مرزائسک ہم ساڑی ئسر۔ داوخت آ وزیراعظم پارے کہ ساڑی حکومت ملکی تاریخ نا اولیکو حکومت ءِ ہرا ملک انا حالیت ءِ بدلیفنگ کن تینا منشور نا رداٹ اسٹرکچرل ریفارمز (ڈھانچہ جاتی اصلاحات) آ عمل کننگ ءِ۔ ننا کوشست آتا مسخت جندی فائدہ غاتا دوئی اف بلکن ملک و ملکی الس نا گچینی ءِ۔ اوپارے کہ قوم تا زند اٹی ڈھانچہ جاتی اصلاحات ہمیشہ تکلیف تروک ءُ مرحلہ اس مریک ولے اوکان پد گچین و شونہال دور اس بناکیک۔ اووزارت اطلاعات ءِ پارت کرے کہ او حکومت نا اصلاحاتی ایجنڈا و اونا مسخت آتے تالان کننگ اٹ تینا کڑد ءِ ادا کے۔ اوپارے کہ سوگو، متحرک و زموار میڈیا ملک انا تعمیر و شونداری و الس ءِ باخبر تخنگ اٹ کلیدی کڑد ادا کیک، وزارت اطلاعات حکومتی پالیسی تا بابت میڈیا نا کمک اٹ الس ءِ باخبر تخنگ کن پین متحرک کڑد ادا کے۔ وزیراعظم پارے کہ میڈیا نا بابت حکومتی پالیسی تا بارواٹی رزاک اٹ کروک آ من گھڑت پروپیگنڈہ نا محرکات آتیان جوانی اٹ بلد ءِ ولے میڈیا تون اواری اٹ دا مذموم ایجنڈا ءِ بے نقاب کننگ نا گرج ءِ ۔ اوپارت کرے کہ وزارت آتا تعلقات عامہ نا آفیسر آک میڈیا نا معلومداری اسکان رسینگ و درست انفارمیشن نا فراوانی ٹی متحرک کڑد ادا کیر۔
