پشاور۔ 14جنوری (اے پی پی) وزیر مملکت داخلہ شہریار خان آفریدی پارینے کہ پاکستان رکھوک دوتے ٹی ءِ و ہموخلقت ءِ مدام یات کننگک ہرافک دا وطن ءِ رکھ جوڑ کننگ کن تینا جان تے ندر کریر۔ اودوشنبے نادے آ فرنٹیئر کور نا 26می بیچ نا پاسنگ آؤٹ پریڈ نا وخت آ ورنا و ساڑی مروک آتیان تران کریکہ۔ اوورناتے پارے کہ نما شمار ہمو خوش نصیب آتے ٹی مریک ہرا ملک انا سیم تا رکھ ءِ کیرہ۔ شہریار آفریدی پارے کہ پاکستانی قوم بے پناہ قربانی تسنو و اینو ننے دنیا ءِ باور کرفوئی ءِ کہ دہشت گردی نا برخلاف دنیا نا غٹ آن بھلا جنگ ءِ پاکستان کننگ ءِ۔ وزیر مملکت پارے کہ ای ہمو لمہ غاتے خراج تحسین پیش کیوہ ہرافک وطن نا بقاکن تینا مارتے قربان کرینو۔ اوپارے کہ او ہمو شہید آتے سلام پیش کیک ہرافک ملک و قوم اکن جان تے ندر کریر و ہر دور اٹی ہراتم کہ قوم آ آزمائش نا ساہت بس فورس آک دشمن نا ڈٹ کر مقابلہ ءِ کریر۔ اوپارے کہ وطن نا دفاع ٹی فرنٹیئر کور نا کڑد مسلمہ ءِ، فورس مدام تینا کڑد ءِ جوانی اٹ ادا کرینے و پین وخت اس ہم کیک۔ اوپارے کہ ننا فوج دشمن تا خن تے ٹی خن خلسا ہر پڑاٹ مردانگی اٹ مقابلہ کیک و دا عمل اٹی ہچ ءُ قربانی اسے آن اینک مفک ۔
