اسلام آباد۔ 14جنوری (اے پی پی) وزیر ریلوے شیخ رشید احمد پارینے کہ پاکستان و ترکی برادر اسلامی ملک ءُ، ہرافتا بھاز متکن ءُ تعلقداری اسے، ترکی ریلوے کن پاکستان ریلوے نا غٹ ڈٹ آک ملوک ءُ ، او بریر و نن تون اواری اٹ کاریم کیر۔ داخیال آتا درشانی ءِ او دوشنبے نادے آ ترک سٹیٹ ریلوے کمپنی تا ڈل اتون اوڑدہی ٹی کرے۔ ترک اسٹیٹ ریلوے کمپنی تلمساس (Talamsas)و ریمیساس(Raymisas) نا ہشت باسکی ڈل انا وزارت ریلوے آ بننگ، پاکستان ریلوے ٹی زرکاری و ریل آپریشن تے ٹی شریداری ٹی بھاز است خواہی نا درشانی ءِ کریر۔ وزیر ریلوے شیخ رشید احمد نا کماشی ٹی دیوان اٹی ترکی ڈل ءِ ریلوے ٹی برجا ڈٹ آتیا احوال تننگا داوخت آ سیکرٹری ریلوے سکندرسلطان راجہ و ایلو آفیسر آک ترک ڈل ءِ احوال تسر۔ ترکی سرکاری کمپنیک تینا پنچ دے ئی دورہ ٹی پاکستان ریلوے نا چندی بشخ و آسراتی تا دورہ ءِ کیرہ۔ ترکی کمپنی تا شیخ رشید احمد ءِ ترکی دورہ و ترک ریل ءِ ہُننگ نا سلہ ہم خلنگا۔ وزیر ریلوے شیخ رشید احمد پارے کہ پاکستان و ترکی برادر اسلامی ملک ءُ ہرافتا تعلقداری بھاز متکن ءِ۔ اوپارے کہ پاکستان ریلوے دا تعلقداری تیان ضرور فائدہ ہرفک ، ترکی ریلوے کن پاکستان ریلوے نا غٹ ڈٹ آک ملوک ءُ۔ او بریر و نن تون اواری اٹ کاریم کیر۔ اوپارے کہ پاکستان ریلوے نا آخبت روشناءِ۔ داڑان مچ آریجن ءِ ملفنگ مریک ہراڑان معاشی شونداری نا پوسکن آ دور بناکیک۔ شیخ رشید احمد پارے کہ پاکستان جہانی شریداری اٹ تینا ریلوے نیٹ ورک ءِ شون تننگ ءِ، ترکی شریداری بے کچ ستاکڑزوک مریک۔
