اسلام آباد۔ 14جنوری (اے پی پی) برطانیہ نا وزیراعظم ٹریزامے آرمی پبلک اسکول پشاور آ دہشت گردی نا جلہو اٹی زندہ بچوک آ طالب علم احمد نواز کن ’’پوائنٹس آف لائٹ ایوارڈ‘‘ نا پڑو ءِ کرینے۔ اودے دا ایوارڈ انتہاپسندی نا برخلاف بطور ورناکارندہ خذمت انجام تننگ آ تننگانے، او دا ایوارڈ ءِ ہلوک آ مسٹ میکو پاکستانی شاری جوڑ مسنے۔ پاکستان اٹی برطانوی ہائی کمیشن نا کنڈآن جاری بیان نا رداٹ احمد نواز برطانیہ نا چندی اسکول آتے ٹی اقوام متحدہ نا کنڈآن اڈ تروک آ دود آتے ٹی ہزار آ طالب علم آتیان تران کرینے و او کمیونٹی تے انتہاپسندی نابرخلاف یکجا مرسا جہد نا است بڈی ءِ کیک۔ برطانیہ نا وزیراعظم ٹریزامے احمد نواز نا پن ءِ تینا کتاب اٹی انتہاپسندی نا برخلاف ورناتے آگاہ کننگ نا رداٹ اونا خذمت آتے نہاد گوندانے و پارینے کہ انتہاپسندی نا برخلاف دا عزم و حوصلہ اونا جندی آزموندہ غاتیا مبنی ءِ۔ اوپارے کہ انتہاپسندی نا انسداد کن جوڑ کروک قومی سلابتی بورڈ انا باسک انا وڑاٹ پنداری احمد نواز نا مثبت کاریم نا اعتراف ءِ۔ احمد نواز ایوارڈ کن پنداری آ برطانوی وزیراعظم نا منت واری ءِ ہرفسا پارے کہ داڑان اودے راج اٹی پین کاریم کننگ نا جوزہ ودی مسنے۔ اوپارے کہ او راج ءِ انتہاپسندی و بیدادی آن پاک کننگ کن ورناتا است بڈی ءِ برجاتخک۔ احمد نواز برطانوی وزارت داخلہ ٹی کاریم کننگ ءِ و ساڑی ہی ٹی اودے انتہاپسندی نا انسداد کن جوڑ کروک قومی سلابتی بورڈ انا باسک پن کننگانے۔ او داکان مست نمبر ٹو ایچ ایٹ ایوارڈ ءِ تینا پن آ کرینے۔
