جان جوڑی و تعلیم نا آسراتی تا فراوانی خلقت ءِ غریبی آن کشنگ نا گچین ءُ وڑاسے، جان جوڑی نا پڑ اٹی نجی بشخ ءِ ہم تینا فعال کڑد ءِ ادا کروئی مریک
راولپنڈی۔ 14جنوری (اے پی پی) صدر مملکت ڈاکٹر عارف علوی پارینے کہ جان جوڑی و تعلیم نا آسراتی تا فراوانی خلقت ءِ غریبی آن کشنگ نا گچین ءُ وڑاسے۔ جان جوڑی نا پڑ اٹی نجی بشخ ءِ ہم تینا فعال کڑد ءِ ادا کروئی مریک۔ اوداہیت ءِ دوشنبے نادے آ داڑے پنجاب ہیلتھ فاؤنڈیشن نا ارٹ میکو روڈ شو انا دود آن تران کرسا پارے۔ صدر مملکت پارے کہ جان جوڑی نا بشخ اٹی ہیلتھ کارڈ جاری کننگ بھلو پیش رفت اسے۔ اوپارے کہ دنیا ٹی جان جوڑی نا پڑاٹ نجی بشخ اہم کڑد ادا کننگ ءِ پاکستان اٹی ہم جان جوڑی نا بشخ اٹی پرائیویٹ سیکٹر ءِ تینا کڑد ءِ ادا کروئی مریک۔ اوپارے کہ راج اٹی ناجوڑی تا توننگ کن احتیاط المی ءِ۔ اومثال ترسا پارے کہ احتیاط آ اسہ روپئی اس خڑچ کرسا درمان نا 100 روپئی ءِ بچفنگ مریک۔ جان جوڑ سرجزآتیان اسہ کنڈ مننگ نا سوب آن چندی ناجوڑیک تالان مننگ ءُ۔ صدر مملکت پارے کہ او وزیر جان جوڑی ءِ ملک اٹی ’’فٹنس ڈے‘‘ اڈتننگ نا سلاہ تسنے۔ اوپارے کہ جان جوڑی و تعلیم نا بشخ اٹی کروک آ گام گیج آتا اثرآک زوت خننگرہ۔
