ولیک اللہ نا آستانہ روحانی فیض انا سرچشمہ غاک ءُ، داڑے بروک آ وخت اس ہم دوخالی ہنپک، مخدوم شاہ محمود قریشی

ملتان۔ 13جنوری (اے پی پی) برصغیر پاک و ہند انا عظیم روحانی پیشوا خواجہ شاہ رکن الدین عالم ؒ نا 705 می مسہ دے ئی عرس مبارک نا ارٹ میکو دے ہم سندھ، بلوچستان و ملک انا ایلو بشخ آتیان زائر آتا بھلو کچ اسے ٹی بننگ نا چرجوئی برجائس۔ ارٹ میکو دے انا دود آتے ٹی ہندوستان نا ریاست راجستھان آن بروک آ 21باسکی ڈل ہم خصوصی وڑاٹ شرکت کرے۔ داوخت آ سیکورٹی نا سخت بست و بند کننگاسس۔ مزار مبارک نا دنگ اٹ اڈہلوک آ ، قومی شاہ رکن عالم کانفرنس‘ نا ارٹ میکو سیشن نا بشخ ہلوک آتیان تران کرسا سجادہ نشین درگاہ عالیہ وزیر خارجہ مخدوم شاہ محمود قریشی پارے کہ ولیک اللہ نا آستانہ روحانی فیض انا سرچشمہ غاک ءُ و داڑے بروک آ وخت اس ہم خالی دوہنپک۔ اوپارے کہ ای درگاہ نا سجادہ نشین نا حیثیت اٹ شاہ رکن عالم ؒ نا عرس اٹی بشخ ہلوک آ غٹ زائر آتے داڑے حاضری آ مبارکباد پیش کیوہ۔ اوپارے کہ راج آن شدت پسندی نا چٹفنگ و امن و یگانگت ءِ مون آ دننگ کن ننے ولی اللہ تا کسر ءِ تینا کروئی مریک و اوفتا کلہو ءِ لس کروئی مریک۔ کانفرنس اٹی نقابت نا فرض ءِ ڈاکٹر صدیق خان قادری انجام تس۔ مخدوم شاہ محمود قریشی کشمیر، فلسطین و شام انا مسلمان تے کن خصوصی دعا کرفے۔ اوپاکستان نا سیم تا رکھ و عالم اسلام آن خلفشار نا چٹفنگ، مسلم امہ ٹی مابت و یگانگت و پاکستان نا امن و سلامتی کن ہم دعا کرفے۔ ’قومی شاہ رکن عالم کانفرنس ‘ نا ارٹ میکو سیشن نا بشخ ہلوک آتیان تران کرسا علامہ ڈاکٹر محمد ارشد بلوچ پارے کہ خواجہ بہاؤالدین زکریا نا قائم کروک جامعہ بہائیہ آن بناکروک آ مشن ءِ حضرت شاہ رکن الدین عالم بھاز تن دہی اٹ مون آ درے۔ اوخلقت ءِ دین و دنیا ہڑتوم آتا تعلیم تس و اوفتے راج انا فعال باسک جوڑ کرے۔