بنجائی وزیر اطلاعات و نشریات چوہدری فواد حسین نا الحمراہال اٹی دود آن تران و میڈیا تو ن ہیت وگپ

لاہور۔ 13جنوری (اے پی پی) بنجائی وزیر اطلاعات و نشریات چوہدری فواد حسین پارینے کہ ننے داوخت آ ہچ ءُ پولیٹیکل چیلنج اس مون تروک اف، نن اسہ سوگوءُ سیاسی حکومت اسے نا بنداو ءِ تخانن و داسہ اسہ سوگو ءُ معاشی پاکستان اسے نا بنداو ءِ تخنگ اُن ، مون نا غٹ بجٹ آک جعلی بجٹ ئسر، اولیکو وار اصل بجٹ بننگ ءِ، امریکہ نا پاکستان تون تعلقداری بھاز جوان مننگ ءِ، وزیراعظم عمران خان نا وژن سیاسی اف بلکن راجی ءِ، عمران خان این آر او آ باورکپک، مون نا حکمرانک بیرہ تینا تجوری تے پُر کریر اوفتے ملک و ملکی معاملہ غاتے ٹی ہچ ءُ است خواہی اس الوکہ، نواز شریف و زرداری نا سیاسی وڑاٹ خاتمہ مسنے۔ اسٹ اس تہٹی ہنا وخت اس کہ ایلو ہِننگ والا ءِ، ہموڑے اوفتا جوان وخت تدینگک، 66ملک آتا ویزہ ءِ پاکستان کن چٹفنگ اُن تانکہ پیشن نا ملک آتیان خلقت پاکستان آ برے و او داڑے داایونٹس آتے انجوائے کننگ کیر، ننے تینا فلم انڈسٹری ءِ دُوارہ بحال کروئی ءِ، کتاب نوشتہ کروک آتا است بڈی ءِ کروئی ءِ۔ او الحمر اہال اٹی ’’افکار تازہ Think fest ‘‘ نا سرحال آ اڈ ہلوک آ دیوان آن تران و میڈیا تون ہیت وگپ کریکہ۔ بنجائی وزیر اطلاعات و نشریات پارے کہ وزیراعظم ہم دا ہیت انا پڑو ءِ کرینے کہ 66 ملک آتا ویزہ ءِ پاکستان کن چٹفنگ اُن تانکہ پیشن ناملک آتیان خلقت پاکستان آ برے و او داڑے دا ایونٹس آتے انجوائے کیر، داڑے میلہ غاتے ٹی بشخ ہلنگ کیر، شرہ دا اف کہ بسنت کون ءُ میلہ مسنے کہ آخا بلکن شرہ دادے کہ اوفتے شکست آتیان ہمہ بچفوئی ءِ داڑکن میکنزم اس جوڑ کننگ اُن۔ اوپارے کہ بدقسمتی اٹ ہنداخہ بھلا بھلا فیسٹیول آتے چٹفنگانے ہرافتے ٹی میلہ چراغاں، سچل سرمست نا میلہ و ایلو میلہ غاک اوار ءُ، ننے داغٹ ءِ دُوارہ اصل دروشم اٹ اتوئی ءِ۔ بنجائی وزیر پارے کہ نن تینا فلم انڈسٹری ءِ دُوارہ بحال کروئی ءِ ، و کتاب نوشتہ کروک آتا است بڈی ءِ کروئی ءِ، داسہ پاکستان اٹی ہندن ءُ حکومت اس بسنے ہرانااست خلقت تون اوار دھڑکک ۔ فواد چوہدری پارے کہ وزیراعظم عمران خان نا وژن سیاسی اف بلکن راجی ءِ، او مدینہ نا ریاست نا ہیت ءِ کیک ہراٹی سگ مرے و اسہ ایلو نا خیال آتے بِننگ و پہہ مننگ نا لائخی مرے۔ ہراٹی انصاف و رحم مرے دا ہمو ریاست ءِ ہرانا کنڈا عمران خان ہِننگ خواہک، و انشاء اللہ ہندا ایجنڈا نا کنڈا ہِننگ اُن۔ اسہ سوج اسے نا ورندی ٹی بنجائی وزیر پارے کہ نواز شریف و آصف علی زرداری پارلیمان نا تہٹی و پیشن تینا مچ آ زور ءِ خلکونو ولے وزیراعظم عمران خان این آر او آ باور کپک، لہٰذا اسٹ تہٹی ہنانے ، ارٹ میکو ہِننگ والا ءِ ، ہموڑے اوفتا جوان ءُ وخت اس تدینگک۔ اوپارے کہ مون نا مچ آ بجٹ آک جعلی بجٹ ئسر، اولیکو وار اصل بجٹ بننگ ءِ، گچین گورننس نا بابت ننا کس اسے تون مقابلہ ہی مفک، ذرس صبر کیر، پاکستان اٹی ہراداوخت آ لیڈر شپ ءِ اوڑا بھروسہ تخر۔