لاہور۔ 13جنوری (اے پی پی) وزیراعلیٰ پنجاب عثمان بزدار پارینے کہ الس ءِ جان جوڑی نا آب اٹ ، پوسکن آ آسراتی تا فراوانی ننا اولیت ءِ۔ جان جوڑی نا بشخ انا شونداری و الس ءِ پوسکن آ طبی آسراتی تا فراوانی کن روڈ میپ اس تیار کننگانے۔ ہیلتھ سیکٹر اٹی اصلاحات نا مسخت الس ءِ آب اٹ، گچین وپوسکن آ طبی آسراتی تا فراوانی ءِ۔ وزیراعلیٰ عثمان بزدار داخیال آتا درشانی ءِ داڑے چندی ڈل آتون اوڑدہی ٹی کرے۔ اوپارے کہ لس بندغ ءِ جان جوڑی نا آسراتی تا فراوانی کن غٹ تر وسیلہ غاتے خڑچ کننگک۔ ہیلتھ کیئر سسٹم نا روایتی نظام ءِ بدلیفنگ کن پوسکن ءُ اصلاحات اتنگک، و ہیلتھ کیئر سسٹم اٹی جاری اصلاحاتی پروگرام نا زوت دورس نتیجہ دوئی مریک۔ اوپارے کہ ہسپتال آتے ٹی بروخت آب اٹ درمان ملنگ مریض آتا حق ءِ۔ جان جوڑی نا بشخ انا گچینی و آب اٹ آسراتی تا فراوانی کن وسیلہ غاتا کمتی ءِ بننگ کن ہلیپنہ و جان جوڑی نا بشخ اٹی گچین، لائخ و پروفیشنل افرادی قوت اتنگک ۔ وزیراعلیٰ پارے کہ جان جوڑی نا آسراتی تا گچینی کن نتیجہ خیز گام گیج چست کننگ انگ ءِ و ہسپتال آتے ٹی آب اٹ طبی آسراتی تا فراوانی ءِ المی جوڑ کننگ کن تینٹ ہسپتال آتا دورہ ءِ کننگ اُٹ و ہسپتال آتا حالیت آتے گچین جوڑ کننگ کن گام گیج آتا مانیٹرنگ ءِ کننگ اُٹ۔ ایمانداری اٹ کروک آ کوشست آتا سوب ہسپتال آتا حالیت آتے ٹی گچینی بریک۔ اوپارے کہ ڈکھیا انسانیت نا ٹھپ آتیا مالم خلنگ بھلو نیکی و عبادت اسے و طب انا بشخ اسہ مقدس ءُ پیشہ اسے و مریض آتے کن مسیحہ نا درجہ تخک۔ وزیراعلیٰ پارے کہ ڈکھیا انسانیت نا خذمت ءِ کروک آ ڈاکٹر، نرس و پیرامیڈیکل اسٹاف نا است بڈی ءِ کننگک۔
