اسلام آباد۔ 13جنوری (اے پی پی) وزارت سمندر پار پاکستانیز و شونداری انسانی وسیلہ سمندر پارپاکستانی تا ڈغار ءِ کوزہ گر آتیان ہلنگ نا چرجوئی ٹی مقدمہ غاتا زوت سماعت کن بنجائی دارالحکومت اٹی فاسٹ ٹریک کورٹ اس جوڑ کننگ نا ڈٹ اس جوڑ کرینن۔ وزیراعظم نا خصوصی کمکار اوورسیز پاکستانیز ذوالفقار عباس بخاری یک شنبے نادے آ اے پی پی تون گپ و تران کرسا اوپارے کہ دارداٹ اسہ سمری اس وزارت کانود ءِ پیش کرینن تانکہ اینخو نا سال داگام گیج ءِ عملی دروشم اس تننگ مرے۔ وزارت سمندر پار پاکستانیز دابابت وزارت کانود تون پدریسہ رابطہ ٹی ءِ۔ اوپارے کہ وزیراعظم عمران خان نا خصوصی پارت آتیا سمندر پار پاکستانی تے ہروڑاٹ آسراتی تننگ و ملک انا چندی بشخ آتے ٹی زرکاری نا کسر اٹی بروک آ اڑاند آتے مر کننگ کن مربوط کوشست کننگ انگ ءِ۔ اوپارے کہ خصوصی عدالت اسہ تُو اسے نا وخت اٹی مقدمہ غاتے پوروکننگ نا اصول آ جوڑ کننگک ، ہرانا جوڑ کننگ المی کانود سازی نا کمک اٹ دا عدالت ءِ پورو آئینی دنگ اس فراوان کننگک۔
