اسلام آباد۔ 13 جنوری (اے پی پی) وزیراعظم نا خصوصی کمکار امور نوجوانان عثمان ڈار پارینے کہ پاکستان تحریک انصاف نا حکومت پوسکن آ پاکستان یوتھ پروگرام نا رداٹ ورناتے روزگار نا فراوانی کن خصوصی پیکج اس تیار کرینے ہرانا رداٹ ورناتے روزگار نا وارخواہی تننگک۔ یک شنبے نادے آ داڑے ’’اے پی پی‘‘ تون گپ و تران کرسا اوپارے کہ حکومت ورناتاویل آتے اولیتی بنداو تیا ایسر کننگ کن پرعزم ءِ انتئے کہ ورناک ملک انا آخبت آک ءُ ، پوسکن آ پاکستان یوتھ پروگرام آن ورناتے بااختیار جوڑ کننگک و ہندن ءُ حکمت عملی اس جوڑ کننگک ہرانار داٹ او تینے و ملک انا آخبت ءِ جوڑ کننگ کن تخلیقی کاریم کننگ کیرہ۔ عثمان ڈار پارے کہ ملک انا شونداری و شونہالی ٹی ورناتا کڑد کلیدی وڑانا ءِ، ورناتے ہم تینا زمواری تے پورو کروئی مرے۔ اوپارے کہ وزیراعظم نا پارت آ زوت اسے اٹ یوتھ پلس پورٹل اس جوڑ کننگک، داڑتون اوار اوار ورناتے کن گڑاس پوسکن ءُ ڈٹ ہم بناکننگک۔ اوپارے کہ ورناک ملک انا آخبت آک ءُ و اوفتا جوان بشخ ہلنگ آن بیدس نن مون آ ہِننگ کپنہ۔ اوپارے کہ وزیراعظم عمران خان مدام بدلی نا عمل اٹی ورناتا کڑد آ زور شاغانے۔
