اسلام آباد۔ 13جنوری (اے پی پی) اسپیکر قومی اسمبلی اسد قیصر پارینے کہ صوبہ خیبر پختونخوا ٹی خذمت آتا پیش نظر الس ننے بنجا تون اوار ایلو صوبہ غاتے ٹی دُوارہ خذمت نا موقع فراوان کرینے، الس نا ویل آتے اولیتی بنداو تیا ایسر کننگ بنجائی، صوبائی و ضلعی حکومت آتا بنداوی زمواری ءِ۔ داخیال آتا درشانی ءِ او ضلع پشاور آن تعلق تخوک آ قومی و صوبائی اسمبلی نا باسک و ضلعی حکومت نا نمائندہ غاتون پشاور اٹی اسہ بڑزکو کہول انا دیوان اسے ٹی گپ و تران کرسا کرے ۔ اسپیکر پارے کہ الس ہراوڑ الیکشن 2018 ٹی خذمت کروک آتیا تیناپبی پت انا درشانی ءِ کرینے ننے ہم ہندا جوزہ تون الس نا ویل آتے ہڑدڑی بنداو تیا ایسر کروئی مرے۔ اوسی پیک نا ذکر ءِ کرسا پارے کہ سی پیک ملک اکن اسہ گیم چینجر اسے ہرانا بھرمک ہر چار آ صوبہ غاتے ٹی نظر بریک۔ دارداٹ خیبر پختونخواٹی دا ڈٹ انا رداٹ چندی شونداری کاریم پورو مننگ ءُ و رشہ کئی اکنامک زون آن شونداری نا پوسکن ءُ کسر ملنگک ہراڑان الس نا زند انا آب گچین مریک۔ اومستی پارے کہ رشہ کئی فری زون نا پوروی آن صوبہ نا الس ءِ روزگار نا پوسکن ءُ وارخواہی دوبریک و خوانندہ ورناتیان بیدس کسب کار بندغ آک ہم تینا معاشی حالیت آتے گچین جوڑ کننگ اٹ سرسہب مریرہ۔ اسہ سوج اسے آ اوپارے کہ پشاور اٹی کاروباری حلقہ غاتا ویل آتیان جوان وڑاٹ بلد اُٹ، داچرجوئی ٹی بنجا و صوبائی زموار آتا نیام اٹ چندی دیوان اڈ ہلکونے ہراٹی پشاور نا ویل آتا سرجم جاچ ءِ ہلنگانے۔ اوپارے کہ ساڑی حکومت کاروباری بشخ انا شونداری کن خصوصی گام گیج چست کننگ ءِ۔ اسد قیصر پارے کہ جان جوڑی و تعلیم نا دوئی ہر پاکستانی نا حق ءِ و ساڑی آ حکومت دا بشخ آتے ٹی گچینی اتنگ کن ہڑدڑی بنداو تیا کاریم کننگ نا بناءِ کرینے۔ ہمو دے مر اف ہراتم پاکستان ہمو ملک آتا صف اٹی سلک ہراڑے تعلیم نا آب، و جان جوڑی نا آسراتی قابل تقلید مریرہ۔ اوپارلیمنٹ نا باسک و ناظم آتے پارت کرسا پارے کہ السی نمائندہ غاتے الس نا غٹ تر ویل آتیان پورو معلوم مرے۔ اوفتے شونداری پروگرام تیا زیات چکار کروئی مرے تانکہ خلقت نا ویل آتے دمدستی ایسر کننگ مرے۔ اوپارے کہ کانود سازی نا کمک اٹ الس ویل آتا کسر اٹی بروک آ اڑاند آتے چٹفنگک ہراڑکن ای حکومت تون اوار اپوزیشن تون رابطہ ٹی اُٹ۔ دیوان اٹی بشخ ہلوک آتے ٹی قومی اسمبلی نا باسک آک نور عالم خان، شوکت علی، شیر علی ارباب، محمود جان ڈپٹی اسپیکر خیبر پختونخوا اسمبلی، اشتیاق ارمر صوبائی وزیر ماحولیات و جنگلات ، تیمور جھگڑا صوبائی وزیر مالیات تون اوار صوبائی اسمبلی نا باسک ناصر موسیٰ زئی، کامران بنگش وزیراعلیٰ نا سلاہکار آئی ٹی، آصف احمد، فضل الٰہی ، فہیم خان، ارباب جان دادا، ارباب وسیم او و ضلعی ناظم محمد عاصم و تحصیل و ٹاؤن ناظمین آک اوار ئسر۔
