وزارت اوورسیز پاکستانیز یو اے ای ٹی بند پاکستانی تا یلہ کننگ کن کوشست آتے ترند کرے
اسلام آباد۔ 10 جنوری (اے پی پی) وزارت اوورسیز پاکستانیز متحدہ عرب امارات اٹی بند پاکستانی تا یلہ کننگ کن کوشست آتے ترند کرینے۔ وزیراعظم نا خصوصی کمکار اوورسیز پاکستانیز ذوالفقار عباس بخاری متحدہ عرب امارات نا دورہ ءِ کرسا وزیر داخلہ یو اے ای تون بندی تا یلہ کننگ نا معاہدہ غا دستخط کیک۔ خصوصی کمکار ذوالفقار عباس بخاری اے پی پی ءِ پارے کہ او پیشن نا ملک آتے ٹی بند پاکستانی تا تکلیف آتے جوانی اٹ پہہ مریک ، بند ی بندغ آتا لمہ و باوہ غاتون ہم اونا اوڑدہی مرسا کاہک ، اونا کوشست ءِ کہ او زوت ایلو ملک آتے ٹی بند پاکستانی تے یلہ کرفنگ اٹ سرسہب مرے داچرجوئی ٹی اونا چندی ملک آتون ہیت وگپ چلینگ انگ ءِ۔ ذوالفقار عباس بخاری پارے کہ او متحدہ عرب امارات نا دورہ ءِ کیک ہراڑے وزیر داخلہ تون اونا اوڑدہی ءِ ہراٹی یو اے ای ٹی چندی مقدمہ غاتے ٹی بند پاکستانی تا یلہ کننگ کن معاہدہ غا دستخط مریک اوکان پد اومیت ءِ کہ بند پاکستانی تا یلہ کننگ ممکن مریک۔
