کوئٹہ۔ 10جنوری (اے پی پی) صوبائی الیکشن کمشنر بلوچستان غلام اسرار خان پنچ شنبے نادے آ ڈپٹی اسپیکر بلوچستان اسمبلی سردار بابر خان موسیٰ خیل تون اوڑدہی کرے داوخت آ بلوچستان آن سینیٹ نا خورک نشست کن 14جنوری 2019 ء آ بلوچستان اسمبلی ٹی مروک آ پولنگ نا تیاری تا بابت الیکشن نا سیکورٹی تون اوار چندی معاملہ غاتیا گپ و تران کننگا و پولنگ اسٹیشن /بلوچستان اسمبلی نا سیکورٹی نا جاچ ءِ ہلنگا۔ڈپٹی اسپیکر بلوچستان اسمبلی سردار بابر خان موسیٰ خیل صوبائی الیکشن کمشنر ءِ یخین دہانی کرفے کہ پولنگ نا دے پولنگ اسٹیشن نا سیکورٹی کن غٹ تر بست و بند آتے کننگک و سیکورٹی نا بابت کانود نافذ کروک آ ادارہ غاتے چھٹی رادہ کننگ انگ ءِ تانکہ سینیٹ نا ضمنی گچین کاری نا مرحلہ جوانی اٹ ایسر مننگ کے داوخت آ اسمبلی اسٹاف نا کنڈآن صوبائی الیکشن کمشنر ءِ پولنگ اسٹیشن نا غٹ تر بست و بند آتا بابت سرجم احوال تننگا و صوبائی الیکشن کمشنر غلام اسرار خان پولنگ اسٹیشن نا تیاری و بست و بند آتیا است جمی نا درشانی ءِ کرسا پارے کہ سینیٹ الیکشن ءِ پرامن و شفاف کننگ کن غٹ تر وسیلہ غاتے کاریم اٹ اتنگک و دارداٹ ہڑتوم آ ادارہ غاتا نیام اٹ رابطہ کاری ءِ پین جوان جوڑ کننگک۔
