بلوچستان اٹی محکمہ جان جوڑی ءِ کاریمی جوڑ کرسا الس ءِ سرکاری کہول آ جان جوڑی نا گچین آسراتی تا فراوانی کن کوشست کننگ اُن، صوبائی وزیر جان جوڑی میر نصیب اللہ مری

کوئٹہ۔ 10 جنوری (اے پی پی) وزیراعلیٰ بلوچستان جام کمال خان نا خصوصی پارت آ صوبہ نا سرکاری ہسپتال آتے ٹی جان جوڑی نا گچین آسراتی ، طبی مشینری نا فعالیت و دوائی تا ہلنگ کن محکمہ جان جوڑی ءِ اسہ ارب روپئی جاری کننگا۔ داہیت ءِ وزیر جان جوڑی بلوچستان میر نصیب اللہ مری بلوچستان عوامی پارٹی نا میڈیا سیل اٹی بنجائی میڈیا کوآرڈینیٹر محمد عظیم کاکڑ تون ہیت وگپ کرسا کرے۔ اوڑدہی ٹی محکمہ جان جوڑی بلوچستان اٹی جاری اصلاحاتی ایجنڈا ءِ قومی و ہندی میڈیا ٹی گچین وڑاٹ تالان کننگ نا گرج آ زور شاغنگا۔ صوبائی وزیر جان جوڑی میر نصیب اللہ مری پارے کہ بلوچستان اٹی محکمہ جان جوڑی ءِ فعال جوڑ کرسا غریب الس ءِ سرکاری کہول آ جان جوڑی نا گچین آسراتی تا فراوانی کن کوشست کننگ اُن و محکمہ جان جوڑی ٹی ایمر جنسی نافذ کرسا سیاسی مصلحت آتا قطع نظر میرٹ آ گام گیج چست کننگ انگ ءِ و صوبہ نا غٹ ضلع غاتے ٹی اسہ وڑ آب اٹ آسراتی تا فراوانی کن ایکشن پلان آ عملدرآمد جاری ءِ، میر نصیب اللہ مری پارے کہ وزیراعلیٰ بلوچستان جام کمال خان نا خصوصی پارت آ محکمہ جان جوڑی ٹی گچین طبی آسراتی تا فراوانی و بحالی کن محکمہ جان جوڑی ءِ ہڑدڑی وڑاٹ اسہ ارب روپئی ریلیز کننگانے ہراڑان بھاز انگا پدسلوک آ ویل آک ایسر مننگ کیرہ اوپارے کہ بنجائی و صوبائی حکومت پرعزم ءُ کہ الس نا اجتماعی ویل آتے پدریسہ ایسر کننگ کن مستین نا قطع نظر ٹھوس و قابل عمل گام گیج چست کننگ انگ ءِ ہرانا دوررس نتیجہ دوئی مننگ بناکرینے اوپارے کہ مستین نا قطع نظر ساڑی آ دور حکومت اٹی جان جوڑی نا سرکاری بشخ آن الس ءِ ریلیف نا فراوانی بناکرینے و مستین نا نسبت جان جوڑی نا بشخ اٹی نمان گچینی بسنے و داٹی پین گچینی بریک داگام گیج آتا تسلسل برجاسلیس تو بروک آ پنچ سال اٹی سرکاری ہسپتال آتے فعال جوڑ کرسا السی خذمت آتا بنجااس جوڑ کینہ۔