اسلام آباد۔ 08 جنوری (اے پی پی) وزیراعظم عمران خان دوشنبے نانن نیمہ غا بے اُرا بندغ آتے کن جوڑ کروک ہنکین، راولپنڈی نا ڈسٹرکٹ ہیڈ کوارٹرز ہسپتال و ہولی فیملی ہسپتال نا اناگت دورہ ءِ کرے و بے اُرا بندغ و ناجوڑ آتے کن تروک آ آسراتی تا جاچ ءِ ہلک۔ وزیراعظم بے اُرا بندغ آتے کن گچین بست و بند آتیا بنجائی وزیر قومی جان جوڑی و انتظامیہ نا ستاءِ کرے و بنجائی وزیر قومی جان جوڑی آن ہولی فیملی ہسپتال نا بارواٹی سرجم رپورٹ اس بٹنگا۔ وزیراعظم عمران خان راولپنڈی نا فوارہ چوک انا خڑک بے اُرا بندغ آتے کن جوڑ کروک ہنکین نا دورہ ءِ کرے و بے اُرا بندغ آتے تروک آ آسراتی تا جاچ ءِ ہلک۔ داوخت آ وزیراعظم تون اوار خصوصی کمکار افتخار درانی و سینیٹر فیصل جاوید ئسک ہم ئسر۔ وزیراعظم عمران خان ہنکین تے ٹی بے اُرا بندغ آتے تروک آ آسراتی تا جاچ ءِ ہلک و ہنکین نا گچین بست و بند کننگ و آسراتی تا فراوانی آ بنجائی وزیر قومی جان جوڑی عامر محمود کیانی و انتظامیہ نا ستاءِ کرے۔ وزیراعظم داوخت آپارے کہ بے کچ یخ انا موسم اٹی خلق خدا کن باسن ءُ لیپ و خور انا فراوانی واقعی عظیم ءُ خذمت اسے۔ اوپارے کہ چھت آن محروم انسان تے کن آب اٹنگا آسراتی تا بست و بند ستاء کڑزک۔
