اسلام آباد۔ 08 جنوری (اے پی پی) صدر مملکت ڈاکٹر عارف علوی پاکستان و جاپان نا نیام اٹ بڑزکو کہول آ تبادلہ غاتا مون آ دننگ آ است جمی نا درشانی ءِ کرسا داہیت آ زور شاغانے کہ سیاسی ، اقتصادی و واپاری بشخ آتے ٹی کمکاری ءِ ودفنگے تانکہ واپار و زرکاری ، سیل و سوات و السی کہول آ رابطہ غاتے ٹی ودکی مرے۔ اوداہیت ءِ پاکستان اٹی جاپان نا سفیر تاکاشی کورائی تون گپ و تران کرسا پارے ہرا تینا سفارتی مد پورو مننگ آ سے شنبے نادے آ داڑے اوڑتون سپاروکی اوڑدہی اس کرے۔ صدر ہڑتوم آ ملک آتا نیام اٹ تین پہ تینی تعلقداری تا پین سوگوی ٹی سفیر نا فعال کڑد انا ستاءِ کرے۔ دزکش مروک آ سفیر پارے کہ پاک۔جاپان تعلقداری تین پہ تینی شرف و کمکاری تون عبارت ءِ۔ اوپارے کہ پاکستان اٹی تینا اڈ کننگ اٹ اودے پاکستانی ریاستی ادارہ غاتیان پبی مخ تفی و کمک دوئی مس و پاکستان اٹی ہر جاگہ غا اونا والہانہ خیرمقدم ءِ کننگا۔
