اسلام آباد۔ 08 جنوری (اے پی پی) چیئرمین نیب جسٹس (ر) جاوید اقبال پارینے کہ وڈی خوری غٹ برائی تا ماس ءِ ، نیب انا ’’احتساب غٹ انا‘‘ نا پالیسی نا گچین نتیجہ دوئی مننگ بناکرینے ، نیب وڈی خوری تون ہم آہنگی وڑاٹ مون تننگ نا عزم ءِ کرینے و وڈی خوری نا برخلاف جنگ ءِ قومی زمواری اس سرپند کیک۔ سے شنبے نادے آ جاری بیان نار داٹ اوپارے کہ وڈی خوری نا چٹفنگ نیب انا اولیت ءِ، نیب انا آفیسر آک ہرا جانفشانی ، خواری ، عزم ، شفافیت و میرٹ نا مظاہرہ ءِ کرینو اونا قومی جہانی کہول آ ستاءِ کننگانے۔ نیب انا آفیسر آک وڈی خور عنصر آتے ہلنگ کن تینا کوشست آتے پین ترند کرینو و اوفتیان پاکستان نا کودک شاری تا خواری نا کٹیا ءِ دوئی کرینو۔ اوپارے کہ نیب اسہ پوسکن ءُ جوزہ سے تون کاریم کننگ ءِ و سرجم جاچ و تنظیمی ، آپریشنل جاچ و پراسیکیوشن نا خوبی و خامی ، وڑوڈول ءِ گچین جوڑ کننگ نا کمک اٹ و ادارہ نا آپریشنز، پراسیکیوشن ، ہیومن ریسورس ڈویلپمنٹ و آگاہی و بچفنگ تون اوار غٹ بشخ آتے دُوارہ متحرک کننگانے۔
