اسلام آباد۔ 08جنوری (اے پی پی) بنجائی وزیر مخدوم خسرو بختیار پارینے کہ ملک اٹی دیر انا کمتی نا ویل انا مون ءِ توننگ و دیری کوڑی و دیر انا گرج ءِ پورو کننگ کن گونڈ، نیامی و مریس وختی ڈٹ آتیا کاریم برجاءِ، حکومت دیر انا کوڑی تے ودفنگ کن بجٹ اٹی فنڈ ہم جتا کرینے، تانکہ دیر انا کوڑی تے ہڑدڑی بنداو تیا جوڑ کننگ مرے۔ بنجائی وزیر پارے کہ پوسکن آ گج ڈیم ڈٹ صوبہ سندھ اٹی آبنوشی و آبپاشی ٹی کمکار جوڑ مریک ہنداخاطران ڈٹ آ حکومت سندھ اتون اواری اٹ عملدرآمد ءِ المی جوڑ کننگک، ڈٹ انا اہمیت ءِ مون آتخسا اونا پوروی کن دمدستی گام گیج کننگک۔ وزارت دیری کوڑی ڈٹ انا ڈیزائن و ایلو معاملہ غاتے دمدستی وڑاٹ ایسر کے۔ داخیال آتا درشانی ءِ او تدوک آ دے سی ڈی ڈبلیو پی نا دیوان آن تران کرسا کرے۔ دیوان اٹی 47 ارب 73کروڑ 25لکھ روپئی نا خڑچ انا نظرثانی مروک پوسکن آ گج ڈیم ڈٹ انا ہم جاچ ءِ ہلک ، داوخت آ سیکرٹری وزارت دیری کوڑی دامعاملہ غاتے ایسر کننگ کن اِراہفتہ نا وخت خواہس۔ ہراڑا بنجائی وزیر مخدوم خسرو بختیار اودے بروک آ ہفتہ اسکان ورندی جمع کننگ نا مہلت تس۔
