اسلام آباد۔ 08 جنوری (اے پی پی) بنجائی وزیر تعلیم و کسبی تربیت شفقت محمود پارینے کہ تحریک انصاف نا حکومت ادب نا بشخ و دودوربیدگی میرات نا شونداری ٹی ہروڑاٹ کمک فراوان کیک۔ اوداخیال آتا درشانی ءِ سے شنبے نادے آ قومی تاریخ و ادبی میرات ڈویژن اٹی کوآرڈینیشن کمیٹی پاکستان میرات سائٹ آ اڈہلوک آ دیوان نا کماشی ءِ کرسا پارے۔ دا فورم جون 2018ء ٹی جوڑ کننگاسس ہرانا مسخت ورثہ نا سائٹ آتیا کمکاری و معلومداری آ صوبائی و بنجائی حکومت آتے ٹی تبادلہ و جاچ ءِ ہلوئی ءِ۔ دانااولیکو دیوان 6جولائی 2018 ء آ اڈ ہلکوسس۔ خیبر پختونخوا، سندھ، گلگت بلتستان و آزاد جموں کشمیر نا دودوربیدگی و آثارقدیمہ نا وزیر آک ، سیکرٹری قومی تاریخ و ادبی میرات ڈویژن انجینئر عامر حسن تون اوار صوبائی سیکرٹریز ڈی جی آثار قدیمہ و میوزیم سید جنید اخلاق و یونیسکو نا ڈائریکٹر ئسک ہم دیوان اٹی ساڑی ئسر۔ مچ آ ملک اٹی دودوربیدگ/قدرتی/مذہبی سائٹ آتا نقشہ غاتا جاچ آ غٹ ساڑی مروک آک رضامندی ظاہر کریر تانکہ ورثہ نا سائٹ آتے رکھ جوڑ کننگ و شونداری ڈٹ آتا جاچ ءِ ہلنگ مرے۔ یونیسکو نا جہانی میرات نا فہرست اٹی پنداری کن دودوربیدگی/قومی میرات نا دستاویز آتا تیاری کن غٹ ساڑی مروک آ اواری اٹ کاریم کننگ آ رضامندی ظاہر کریر۔ حکومت پنجاب نا نمائندہ ورلڈ ہیریٹیج سائٹ کن اورنج ٹرین لین ڈٹ، شالیمار گارڈن نا اثر آتیا سرجم پریزنٹیشن تس۔ خیبر پختونخوا نا ڈائریکٹر آثار قدیمہ کابینہ نا روشنی ٹی خیبر پختونخوا حکومتی گام گیج آتا بارواٹی سرجم آتیان معلومدار کرے۔ بنجائی وزیر شفقت محمود ڈویژن نا کنڈآن ادب نا بشخ و دودوربیدگی میرات نا تعمیر و شونداری ٹی کمکاری ءِ مون آ دننگ و ہروڑاٹ کمکاری نا فراوانی نا یخین دہانی کرفنگا۔ غٹ صوبہ غاتیان روثہ ءِ رکھوک جوعڑ کننگ کن سلاہ وسوج تننگ نا پارت جاری کرے۔
