اسلام آباد۔ 07 جنوری (اے پی پی) بنجائی وزیر ڈٹ بندی شونداری و اصلاحات و شماریات مخدوم خسرو بختیار پارینے کہ ساڑی حکومت ملک آن پولیو نا چٹفنگ کن پبی گام گیج کننگ ءِ ، پولیو نا چٹفنگ قومی اولیت آتے ٹی اوار ءِ و دا نا پورو مون ءِ توننگ کن جامع ڈٹ بندی اسے نا گرج ءِ۔ سی ڈی ڈبلیو پی پولیو نا چٹفنگ نا بابت نظرثانی مروک ڈٹ ءِ ایکنک آ گدریفنگ نا عبوری وڑاٹ منظوری ءِ ترسا پارت کرسا پارینے کہ ڈٹ آ عملدرآمد کن مانیٹرنگ میکنزم اس جوڑ کننگے، صوبہ غاتا کنڈآن پولیو نا چٹفنگ نا مد اٹی ہلوک آ وام تا ادائیگی نا یخین دہانی ہلنگے، پولیو وائرس نا ساڑی کوڑی ءِ صوبہ غاتون اواری اٹ چٹفنگ کن گام گیج کننگے، تعلقدار وزارت ہفت دے اٹی غٹ سلاہ و سوج بمعہ آگاہی مہم و کمیونیکیشن نا خڑچ آتا سرجم آتے ہم ایتے۔ داخیال آتا درشانی ءِ او تدوک آ دے سینٹرل ڈویلپمنٹ ورکنگ پارٹی نا دیوان آن تران کرسا کرے۔ دیوان اٹی پولیو نا چٹفنگ نا بابت آن 986.3ملین ڈالر ڈٹ آتیا احوال تننگا، دیوان ءِ پاننگاکہ سال 2019 ء نا آخیر اسکان پولیو نا مون ءِ توننگ مننگ کیک، پولیو نا پورو چٹفنگ و فالو اپ کن پین اِراسال نا وخت درکار مریک۔
