اسلام آباد۔ 06جنوری (اے پی پی) وزیراعظم عمران خان و ابوظہبی نا ولی عہد شیخ محمد بن زید النہیان نا نیام اٹ اوڑدہی مس ہراٹی تین پہ تینی است خواہی نا معاملہ غاتیا گپ و تران کننگا، مون پہ مون اوڑدہی آن پد ہڑتوم آ ملک آتا نیام اٹ ڈل آتا کہول آ مذاکرات مس، پاکستانی ڈل انا سرکڑدہ ہی ءِ وزیراعظم عمران خان کرے وخت اس کہ متحدہ عرب امارات نا ڈل انا سرکڑدہ ہی ءِ ابوظہبی نا ولی عہد شیخ محمد بن زید النہیان کرے۔ پاکستان نا ڈل اٹی بنجائی وزیر چوہدری فواد حسین، شاہ محمود قریشی، اسد عمر، علی زیدی، عبدالرزاق داؤد، زبیدہ جلال، چوہدری غلام سرور، عمر ایوب خان و شہریار آفریدی اوار ئسر۔ سمندر پار پاکستانی تے کن وزیراعظم نا خصوصی کمکار ذوالفقار بخاری و سیکرٹری خارجہ تہمینہ جنجوعہ ئسک ہم ڈل اٹی اوار ئسر۔ داکان مست ابوظہبی نا ولی عہد شیخ محمد بن زید النہیان اسلام آباد آ سرمس تو اودے بیست ءُ یک توپ آتا سلامی تننگا۔ وزیراعظم عمران خان نور خان ایئر بیس آ شرفدار آ مہمان تے بخیر کرے۔ وزیراعظم عمران خان نور خان ایئر بیس آن تینٹ گاڈی ءِ چلیفسا شرفدار آ مہمان تے وزیراعظم ہاؤس آ ایس، اوکان پد وزیراعظم ہاؤس اٹی شیخ محمد بن زید النہیان نا شرف اٹی باضابطہ بیابخیری دود اس مس۔ دود اٹی ہڑتوم آ ملک آتا قومی ترانہ ءِ خلنگا۔ داوخت آ سلہہ بند فوج انا چاق و چوبند دستہ شرفدار آ مہمان تے سلامی پیش کرے۔ ولی عہد شیخ محمد بن زید النہیان گارڈ آف آنر نا جاچ ءِ ہلک۔ وزیراعظم عمران خان شرفدار آ مہمان تون کابینہ نا درستی راستی ءِ کرفے۔ ابوظہبی نا ولی عہد وزیراعظم عمران خان تون تینا ڈل انا باسک آتا درستی راستی ءِ ہم کرفے۔ پاک فضائیہ نا جے ایف 17 تھنڈر جہاز آک شرفدار آ مہمان ءِ سلامی تسر۔ شیخ محمد زید النہیان نا داخہ در گرم جوشی اٹ بخیر ہڑتوم آ ملک آتا نیام اٹ کیہی دہائی تا خڑکی برادرانہ تعلقداری نا عکاس ءِ۔
