اسلام آباد۔ 12جنوری (اے پی پی) وزیراعظم محمد نواز شریف پارینے کہ جغرافیائی قربت نا سوب پاکستان و اومان فطری سیوتی ئُ، کراچی، گوادر و مسقط نا نیام اٹ فیری سروس بناءکننگ نا سلاہ خوش آئند ئِ ہراڑآن ہڑتوم آ ملک آتا نیام اٹ سنگتی نا پوسکن ئُ باب اسے نا بناءمریک۔ دا سروس دا ہند آتیا باقاعدگی اٹ سفر کروک آ خلقت نا بھلو کچ اسے کن ہن و بر ناہڑزان و متبادل ذریعہ فراوا ن کیک۔ اوداہیت ئِ اومان سٹیٹ کونسل نا صدر ڈاکٹر یحیٰ محفوظ سلیم تون ہیت وگپ کرسا پارے ہراک ڈل اتون اوار پنچ شنبے آ وزیراعظم ہاﺅس اٹی اوڑتون اوڑدہی کریر ۔ وزیراعظم پارے کہ پاکستان نا حکومت ، الس و سروکی سلطان قابوس بن سید السید و اومان نا برادر الس نا بے حد شرف ئِ کیرہ۔ اوسلطان قابوس و اومان نا برادر الس کن پاکستان نا الس و حکومت نا کنڈآن نیک است خواہی تے ہم سرکرے۔ اوپارے کہ پاکستان ۔خلیج کمکار کونسل آزادانہ واپاری معاہدہ نا بابت مخ تفی کننگ آ اومان نا منت وار ئِ۔ اوپارے کہ پاکستان خاص کر توانائی نا بابت ڈٹ، بنداوی ڈھانچہ و صارف آ مبنی صنعت نا بشخ آتیٹی اومان نا کنڈآن پاکستان اٹی زرکاری نا خیرمقدم ئِ کیک دُن کہ ننا ساڑی حکومت زرکاری پالیسی آن براہ راست زرکاری کن غٹ بشخ آتیٹی زرکاری دوست چاگڑد ودی مسنے ودرملکی و ہندی زرکار آتون اسہ وڑنا سلوک ئِ المی جوڑ کننگ انگ ئِ وخت اس کہ بند شرح کٹیا تون درملکی زرکاری ئِ رکھ دوئی ئِ۔ وزیراعظم السی کہول آ رابطہ غاتیا ہیت وگپ کرسا پارے کہ اومان اٹی کیہی بشخ آتیٹی پاکستانی برادری نا مناسب کچ ساڑی ئِ و پاکستان میڈیسن ، انجینئرنگ ، انفارمیشن ٹیکنالوجی ، اکاﺅنٹینسی ، تعلیم و تکنیکی ورکرآتون کیہی بشخ آتیٹی غیر ہنر مند و پیشہ وارانہ افرادی واک فراوان کننگ کیک۔ اوپارے کہ ہڑتوم آ ملک آک تعلیم، سائنس و ٹیکنالوجی نا بشخ اٹی مہارت نا تین پہ تینی درشان تیان ہم فائدہ ہرفنگ کیرہ۔ اومانی ڈل اٹی تعلیم و پٹ پولی کمیٹی نا باسک شیخ حامد محمد عبداللہ امخینی ، کلچر میڈیا اینڈ ٹوررزم کمیٹی نا باسک محمد احمد علی الرواس ، اقتصادی کمیٹی نا باسک ڈاکٹر احمد سلیمان صالح، راجی کمیٹی نا نائب چیئرمین وفا سالم عالی الحراثی و راجی کمیٹی نا باسک ڈاکٹر عائشہ احمد یوسف اوار ئسر۔ اوڑدہی ٹی چیئرمین سینیٹ میاں رضا ربانی ، سینیٹر تاج حیدر و ایلو سینئر کمامدارآک ہم ساڑی ئسر۔
