نائب مزن وزیر اسحاق ڈار ءَ سعودی عرب ، ترکی ءُ مصر ءِ درئی کارانی وزیرانی ھواری ءَ مصر ءِ صدر عبدالفتاح السیسی ءَ گوں یکجائی گند ءُ نند

قاہرہ ۔21جون  (اے پی پی): پاکستان ءِ نائب مزن وزیر ءُ درئی کارانی وزیر سینیٹر محمد اسحاق ڈار ءَ گوں سعودی ءِ درئی کارانی وزیر شہزادہ فیصل بن فرحان السعود، ترک ءِ درئی کارانی وزیر ھاکان فیدان  ءُ مصر ءِ درئی کارانی وزیر ڈاکٹر بدر عبدالعتی ءَ گوں مصر ءِ صدر ڈاکٹر بدر عبدالعتی ءَ یکجاھیں گند ءُ نند کت۔ نائب مزن وزیر ءُ دری کارانی وزیر ءَ صدر آصف علی زرداری، مزن وزیر محمد شہباز شریف ءُ فیلڈ مارشل سید عاصم منیر ءِ نیکیں واھگ ءُ مبارکباد صدر السیسی ءَ را سر کت ءُ پاکستان ءِ وتی دیریں ءُ کثیر جہت ءِ سیادی ءَ را گیش مھکم کنگ ءِ جزم  ءِ پدا زور دات۔ درئی کارانی کارگس ءِ نیمگ ءَ جاڑی بوتگیں بیان ءِ تہ ءَ نائب مزن وزیر ءُ دری کارانی وزیر محمد اسحاق ڈار ءَ پاکستان ءُ مصر ءِ نیام ءَ گوستگیں مزن تک ءِ رابطہ آنی آسر ءَ چہ پیداکیں جوانیں دیمروئی آناں ساڑات، ایشی ءَ جتا جتائیں پڑ آنی تہ ءَ دو نیمگی کمک ءَ را گیش گہتری ءِ تہ ءَ کرد پیلو کتگ۔ آئی ءَ صدر السیسی ءِ نیمگ ءَ مزن وزیر محمد شہباز شریف ءِ پاکستان ءِ تر ءُ تاب ءِ دعوت ءِ منگ ءَ را وش اتک کت ءُ امیت ءِ درشان کت کہ دوئیں ملک آنی سروکی ءِ تر ءُ تاب ءِ تبادلہ زوتاں چہ زوت وت مہ وتی آسراتی ءِ رد ءَ بیت۔ گند ءُ نند ءَ دمگی ءُ میاں اوستمانی معاملہ ھاسیں رنگ ءَ میاں اوستمانی ءِ بدل بوھوکیں جاور ھال آنی سر ءَ خطہ ءِ تہ ءَ امن، برجائی، گپ ءُ تران ءُ سفارتی سیادی آنی دیم ءَ برگ ءِ ارزشت ءِ سر ءَ گپ ءُ تران کنگ بوت۔ مصر ءِ صدر السیسی ءَ صدر آصف علی زرداری ءُ پاکستان ءِ سروکی ءِ نیمگ ءَ چہ داتگیں نیکیں واھشت آنی سر ءَ نیک راھی ءِ گوما پسو دات۔ آئی ءَ دمگ ءَ گپ ءُ تران ءِ دیمروئی، کش ءُ گوری ءُ سفارتی سیادی آنی تہ ءَ کمی ءِ تہ ءَ پاکستان ءِ جوڑیشت ءُ ذمہ واریں کرد ءَ را ساڑات ءُ دمگی امن ءُ ایمنی ءِ واستہ مزن وزیر، نائب مزن وزیر، درئی کار ءُ فیلڈ مارشل ءِ نیمگ ءَ چہ کتگیں کوشست آناں وش اتک کت۔ صدر السیسی ءَ امیت سہرا کت کہ برجاھیں کوشست ءُ گپ ءُ تران ءِ آیوکیں پڑ ءَ چہ دمگ ءَ برجمیں امن، ایمنی ءُ وشھالی ءِ دیمروئی ءَ کمک رسیت۔ گند ءُ نند ءَ پاکستان، مصر، سعودی عرب ءُ ترکی ءِ دری کارانی وزیر آنی نیام ءَ آر فور فریم ورک ءِ چیر دستی ءَ بوتگیں مشورہ آنی سر ءَ ھم دلگوشی دیگ بوت۔ رہشوناں یکجائی مفاد ءِ جیڈھ آنی سر ءَ منظم گپ ءُ تران، اسٹریٹجک مشاورت ءُ پالیسی ءِ ھمگرنچی ءِ واستہ آر فور ءِ گیش بوھوکیں ارزشت ءِ سر ءَ زور پر دات۔ آہاں امن، استحکام، اقتصادی دیمروئی ءُ دمگی وشحالی ءِ دیمروئی ءِ ضلورت ءِ سرا زور پر دات کہ ایشی ءِ ھاتر ءَ درستیں ملک ءُ آہانی راج آنی یکجائی مفاد آناں دیم ءَ برگ ءِ ھاتر ءَ مدام رابطہ ءُ یکجائی کوشست آنی وسیلگ ءَ کنگ بہ بیت۔ اے دیوان سک گرم ءُ دوستانہ ماحول ءَ بوتگ ات کہ ایشی ءِ تہا بہر زوروکیں ملک آنی نیام ءَ نزیکیں دوستی ءُ یکے دومی ءِ احترام ءِ مھکمیں بندش ءِ درشانی کنگ بوتگ ات۔