گپ ءُ تران ءِ سوبمندی ءَ چہ سرجمیں دگنیا ءَ امن ، دیمروئی ءُ وشھالی ءَ را دل یکیمی کنگ ءَ کمک رسیت ،  صدر ٹرمپ ءِ زانتکاریں سروکی ءَ چہ اے گپ ءُ تران ممکن بوتگ۔ گپ ءُ تران ءِ تہا فیلڈ مارشل سید عاصم منیر ءِ سک باز کرد انت، مزن وزیر شہباز شریف

برگن سٹاک،سوئٹزرلینڈ۔21جون  (اے پی پی): مزن وزیر محمد شہباز شریف ءَ امریکہ ءُ ایران ءِ نیام ءَ ٹیکنیکل تک ءِ گپ ءُ تران ءِ کامیابی ءِ واستہ نیکیں واھگ آنی درشان کنان ءَ گوشت کہ اے جھان ءِ امن ءِ واستہ ھاسیں موہ اِنت۔ ما یکجاہ دنیا ءِ تہا تپاکی جوڑ کُت کنیں۔ گپ ءُ تران ءِ سوبمندی ءَ چہ سرجمیں دگنیا ءَ امن ، دیمروئی ءُ وشھالی ءَ را دل یکیمی کنگ ءَ کمک رسیت ۔ صدر ٹرمپ ءِ زانتکاریں سروکی ءَ چہ اے گپ ءُ تران ممکن بوتگ۔ گپ ءُ تران ءَ فیلڈ مارشل سید عاصم منیر ءِ سک باز کرد انت ۔ آئی ءَ اے ھیالانی درشانی یک شمبے ءِ روچ ءَ ادا ’’اسلام آباد تپاک نامہ‘‘ ءِ برجائی ءِ رد ءَ پاکستان ءِ میزبانی ءَ امریکہ ءُ ایران ءِ نیام ءَ تکنیکی تک ءِ گپ ءُ تران ءِ بندات ءَ چہ پیسر گپ ءُ تران کنان ءَ کت۔ اے موہ ءِ سر ءَ پاک اُرد ءِ سروک ءُ دفاعی اُرد ءِ سروک فیلڈ مارشل سید عاصم منیر، وفاقی تہی کارانی وزیر محسن نقوی ءُ وفاقی وزیر ءِ اھوال ءُ شنگکاری عطا اللہ ترار ھم ساڑی ات۔ مزن وزیر محمد شہباز شریف ءُ فیلڈ مارشل سید عاصم منیر ءَ امریکی ءُ ایرانی ڈل آناں سروک دیوان ءِ ہال ءَ سر بوھگ ءِ وھد ءَ گوں دلجمی ءَ وش آتک کت ءُ ڈل آنی باسک آنی گوما دست ءُ دیم کت ءُ وشیں گپ ءُ تران کت۔ مزن وزیر محمد شہباز شریف ءَ گوشت کہ امریکہ ءُ ایران ءِ نیام ءَ ٹیکنیکل کچ ءِ گپ ءُ تران جھان ءِ امن ءِ واستہ ھاسیں موہ انت۔ آئی ءَ صدر ڈونلڈ ٹرمپ ءِ منت گپت کہ آئی ءَ وتی ھیال ءُ لیکہ ءِ سروکی ءِ سر ءَ گپ ءُ تران ممکن کتگ۔ ادا امریکی ءُ ایرانی ڈلانی نیام ءَ بامردیں گپ ءُ تران بنت ءُ مارا امیت انت کہ ایشی ءَ چہ پائدگ مندیں آسر دیم ءَ کیت۔ امریکہ ءِ نائب صدر جے ڈی وینسی وتی ملک ءِ ڈل ءِ سروکی ءَ کنگ ءَ انت۔ آئی ءَ قطر ءِ مزن وزیر ءِ کرد ءِ پد ءَ منت گپت۔ مزن وزیر ءَ گوشت کہ گپ ءُ تران ءَ فیلڈ مارشل سید عاصم منیر ءِ سک باز ارزشتی ایں کرد انت۔ آئی ءَ پہ ایشی ءَ بازیں جھد ءُ کوشستے کتگ۔ ہما یکجائی جہد ءِ آسر ءَ ما مرچی ادا اتکگیں ۔ ما ادا یکجاہ بوتگیں، ءُ مذاکرات ءِ سوبمندی ءِ بابت ءَ سک باز پرامیدیں، کہ ایشی ءَ چہ سرجمیں دنیا ءَ امن، دیمروئی ءُ وشحالی ءَ را دل یکیمی کنگ ءَ کمک رسیت۔ امریکہ ءِ نائب صدر جے ڈی وینسی ءَ گشتگ کہ مرچی امن ءُ ایمنی ، دیمروئی ءُ بحران ءِ ھلاسی ءِ واستہ مزنیں روچ انت ۔ آئی ءَ گوشت کہ میاں اوستمانی تک ءَ استحکام سفارتکاری ءُ گپ ءُ تران ءِ وسیلگ ءَ ممکن اِنت، جوڑیشت گپ ءُ تران ءَ چہ جوانیں آسر دیم ءَ کیت، امن ءِ واستہ ایران ءِ جوانیں کرد لوٹ ایت، جیڈھ آنی سر ءَ جوانیں گپ ءُ تران ءِ ضلورت اِنت، امن ءِ برجائی ءِ واستہ مارا درستاں یکجائی ءَ کار کنگی اِنت۔ آئی ءَ گوشت کہ امن ءُ مذاکرات ءِ واستہ مزن وزیر محمد شہباز شریف ءُ فیلڈ مارشل سید عاصم منیر ءِ کرد ستا کرز انت، فیلڈ مارشل سید عاصم منیر جوانیں فوجی سروک انت، دگنیا ءَ پاکستان ءِ کرد ساڑاھگ بوتگ انت۔ آئی ءَ گوشت کہ امن گپ ءُ تران آنی تہ ءَ قطر ءِ کرد ھم ستا کرز اِیت، ما آیوکیں وھد ءِ واستہ گہتریں کار کنگ لوٹ آں، میاں اوستمانی تک ءَ امن برجائی مئے اولی ترجی اِنت، لبنان ءِ جاور ھال آنی بابت ءَ جیڈھ است اِنت، امریکی صدر ڈونلڈ ٹرمپ لبنان ءِ تہ ءَ کش ءُ چیل آناں ھلاس کنگ ءِ کوشست ءَ کنگ ءَ اِنت۔ اے موہ ءِ سر ءَ قطر ءِ مزن وزیر محمد بن عبدالرحمن بن جاسم الثانی ءَ دمگ ءُ دگنیا ءَ امن ءِ برجائی ءِ واستہ ءُ امریکہ ءُ ایران ءِ نیام ءَ گپ ءُ تران ءِ واستہ مزن وزیر محمد شہباز شریف ءُ فیلڈ مارشل سید عاصم منیر ءِ کوشست آناں شگر ءُ منت گپت۔