توانائی نا تنکی، امن و ایمنی نا اڈتننگ و معیشت نا بحالی کون آ بھلا ویل آتا مون ئِ توننگانے، جوڑجاڑ و شونداری نا ڈٹ آتیان بے روزگاری چٹک و ملک اٹی شونہالی بریک
اسلام آباد۔ 10جنوری (اے پی پی) وزیراعظم محمد نواز شریف پارینے کہ توانائی نا تنکی ، امن و ایمنی نا اڈتننگ و معیشت نا بحالی کون آ بھلا ویل آتا مون ئِ توننگانے۔ جوڑ جاڑ و شونداری نا ڈٹ آتیان بے روزگاری چٹک و ملک اٹی شونہالی بریک، 180 ارب روپئی نا پیکج نا رداٹ گام گیج آتیان ملکی برآمد آتیٹی کیہی گناہ ودکی مریک، است خواہی ئِ کہ کشت و کشار و صنعت نا بشخ ترندی اٹ مون آ کار، پاکستان نا معاشی کارکڑد انا جہانی کہول آ امنا کننگ انگ ئِ۔ او سے شنبے آ داڑے واپار نا مون آ دننگ کن گام گیج آتا دود آن تران کریکہ۔ بنجائی وزیر خزانہ سینیٹر اسحاق ڈار ، بنجائی وزیر واپارخرم دستگیر ، بنجاایوان ہائے صنعت و واپار پاکستان (ایف پی سی سی آئی ) نا صدر زبیر طفیل، آل پاکستان ٹیکسٹائل ملز ایسوسی ایشن نا چیئرمین عامر فیاض شیخ، وزیرآک، پارلیمنٹ نا باسک و پنی برآمد کنندگان و کاروباری شخصیت آک ہم دود اٹی ساڑی ئسر۔ وزیراعظم پارے کہ 180 ارب روپئی نا پیکج آن کاروبار و برآمد آتیٹی کیہی گناہ ودکی مریک، داکان مست کشارگرآتا شونداری کن ہم پیکج تننگاسس، خواہش ئِ کہ کشت و کشار و صنعت ہڑتوم آ بشخ آک ترندی اٹ شون ہلیرہراڑآن بے روزگاری و جہالت چٹک و ملک مون آ کائک۔ اوپارے کہ داسہ حالیت آک بھاز گچین ئُ، 2013 ءآن مست ملک ئِ بجلی نا لوڈشیڈنگ ، دہشت گردی آن امن وایمنی ، بے روزگاری و معاشی نزوری کون آ بھلا ویل آتا مون تروکی ئس ، ملک انا آخبت نا بارواٹی قیاس آرائی مسکہ، دا چنکو ویل اس الوکہ، دابابت گدرینگوک آ حکومت آتیان بایدے ہریفنگے کہ اوفک داکنڈا چکار انت اکن کتوس۔ وزیراعظم پارے کہ داسہ توانائی نا کاختی نا ویل انا مون ئِ توننگانے، ملکی معیشت سوگو مسنے و اقتصادی ٹک آتیٹی گچینی و شونداری نا امناجہانی ادارہ غاک کننگ ئُ۔ اوگڑاس ٹی وی چینل آتا کنڈآن بے سوب تنقید نا حوالہ ئِ ترسا پارے کہ نن جوڑ جاڑی تنقید نا خیرمقدم ئِ کینہ ولے بایدے دُن ئُ چاگڑد ودی کننگپ ہراڑآن ملک اٹی مایوسی تالان مرے۔ حکومتی پالیسی تیا تنقید اصلاح نا پہلو آن بایدے مرے۔ وزیراعظم پارے کہ بجلی نا لوڈشیڈنگ اینو بھاز کم مسنے ہرا 2018 ءٹی چٹک، ننا مسخت بیرہ بجلی نا کاختی ئِ چٹفنگ نا اف بلکن اونا نرخ ئِ ہم کم کروئی ئِ ، بجلی نا نرخ 4آن 5روپئی فی یونٹ کم مسنے ہراٹی پین کمتی ہم مریک۔ دا سمت اٹی نن مون آ ہِننگ اُن ، بجلی نا کارخانہ خلنگ انگ ئِ ۔ اوپارے کہ تربیلا و منگلاآن ہم بھلو ڈٹ بھاشا ڈیم نا جوڑ جاڑ نا فیصلہ کرینن ہراڑآن 4500 میگاواٹ بجلی دوئی مریک۔ ڈٹ ئِ ملکی وسیلہ غاتیان پورو کننگک۔ وزیراعظم پارے کہ 2018ءٹی 10ہزار میگاواٹ بجلی سسٹم اٹی اوار مریک وخت اس کہ بروک آ منہ سال اٹی 30ہزار میگاواٹ بجلی سسٹم اٹی اوار مریک ، د اچنکو ہیت اس اف۔ اوپارے کہ حکومت ریلوے نا اپ گریڈیشن نا کاریم نا ہم بنائِ کرینے ہراڑآن ریل تا رفتار دگنی مریک ۔ داوخت آ وزیراعظم ملک اٹی شاہراہ تا جوڑ جاڑ نا ڈٹ آتا ذکر ئِ کرسا پارے کہ داڈٹ آتیان ملک انا غٹ بشخ آتے اسہ ایلو ٹی گنڈنگ انگ ئِ۔ داکان بیدس کھیت اٹی منڈی اسکان روڈآتا جوڑ جاڑ نا ڈٹ ہم بے کچ اہمیت تخرہ۔ اوپارے کہ بلوچستان پورو وڑاٹ بدلینگ انگ ئِ، مچ آ ملک اٹی جوڑ جاڑ و شونداری نا ڈٹ آتیا کاریم کننگ انگ ئِ۔ اوپارے کہ ملکی معیشت گچین مسنے، جہانی ادارہ غاک پاکستان نامعیشت نا بحالی و شونداری ئِ امنا کننگ ئُ۔ وزیراعظم پارے کہ کشت وکشار آن پد برآمد آتا بشخ اکن تروک آ پیکج نا رداٹ گام گیج آتیان کاروبار ومعیشت آ مثبت زئم تمک ہراڑآن بے روزگاری کون آ ویل آک چٹرہ و ملک شونداری کیک۔ داکان مست وزیر خزانہ محمد اسحاق ڈار تینا تران اٹی پارے کہ دا اہم دود انا اڈتننگ نا پس پردہ بھاز محنت کارفرمائِ ۔ اوپارے کہ کاروباری برادری خاص کر برآمد کنندگان آتون سرجم ہیت وگپ کننگا۔ برآمد کنندگان آتون مذاکرات آن پد جامع پیکج اس جوڑ کننگانے۔ اوپارے کہ حکومت گدرینگوک آ اِرا سال اٹی برآمد آتا مون آ دننگ کن چندی اہم گام گیج چست کرینے، بجٹ اٹی برآمد آتا پنچ اہم بشخ جاٹ آتے زیروریٹ کننگا، ٹیکسٹائل نا بشخ ئِ کیہی آسودہی تننگا۔ داکان بیدس کشت وکشار نا بشخ انا شونداری کن تاریخی پیکج تننگا۔ داپیکج ئِ مچ آ ملک اٹی پبی است خواہی ملا۔ اوپارے کہ وزیراعظم نا خواہش ئس کہ ملکی اسٹاک مارکیٹ سوگو مرے۔ اوپارے کہ اسٹاک مارکیٹ اٹی درملکی زرکار بننگ ئِ۔ اوپارے کہ وزیراعظم محمد نواز شریف ملک ئِ وت واجہ، پرامن و شونہال جوڑ کننگ نا خواہندار ئِ۔ دارداٹ معیشت اتون اوار غٹ بشخ جاٹ اٹی اہم گام گیج چست کننگ انگ ئِ و اونا داتغ یقینا پورو مریک۔ آل پاکستان ٹیکسٹائل ملز ایسوسی ایشن نا چیئرمین عامر فیاض شیخ پارے کہ 2013ءنا او دے ہم ننے یات ئِ ہراتم ملکی خزانہ خورک ئس، اینو معیشت سوگو و توانائی نا تنکی نا بھلو حد اسسکان مون ئِ توننگانے۔ اوپارے کہ غٹ شونداری ہلوک ملک آک برآمد آتیٹی شونداری کرسا ملک ئِ شونداری نا کسر آ روان کرینے ۔ اوپارے کہ قومی سلامتی کن سوگو معیشت المی ئِ۔ اوپارے کہ وسیلہ غاتا کمتی نا باوجود برآمد آتا مون آ دننگ کن پیکج نا رداٹ آسودہی فراوان کننگ آ وزیراعظم نا منت وار ئِ۔
