اسلام آباد۔ 10 جنوری (اے پی پی) دفاعی جاچکار میجر جنرل (ر) فاروق ملک پارینے کہ پاکستان تہہ نا و پیشن نا خلیس نا بے کچ دروشم اٹ بابر سوئم میزائل ئِ کاریم اٹ اتنگ آن پاناد کپک۔ احوالکار آتون ہیت وگپ کرسا اوپارے کہ پاکستان اسہ پرامن ئُ ملک اسے و ننا بقاہنداٹی ئِ کہ نن تون بایدے داخہ دفاعی لائخی مرے کہ ننا دشمن ننا کنڈا خراب انگا نظر اٹ ہُننگ کپ۔ اوپارے کہ ننا نیشنل سیکورٹی پالیسی ہم ہندادے کہ ملٹری تنظیم سازی و سلہہ بازی ٹی ہنداخہ توازن تخن کہ نن وخت اس ہم دشمن نا نرغہ ٹی بفن و ننا دہشت دشمن نا اعصاب اٹ طاری سلے۔ میجر جنرل (ر) پارے کہ گدرینگوک آ منہ وخت آن بھارت سلہہ یکجا کننگ اٹی اختہ ئِ ہراڑآن پاکستان تون اوار ڈیہہ ئِ گڑتی لاحق ئِ و پاکستان نا کنڈآن سمندر آن خلوک آ بابر سوئم نا آزموندہ ہندا چرجوئی نا اسہ کڑی اسے کہ نن تینا ملک انا سالمیت کن پبی دفاعی لائخی دوئی کین۔ فاروق ملک پارے کہ پاکستان دا میزائل ئِ ملک انا تہہ نا و پیشن نا خلیس و دشمن نا بے کچ عزم آتا دروشم اٹی ضرور کاریم اٹ اتیک۔ پاک بحریہ نا بابت چست کروک آ سوج انا ورندی ئِ ترسا اوپارے کہ پاکستان نیوی ملک انا سیم تا دفاع و دشمن ئِ پبی ورندی تننگ نا پبی لائخی تخک۔
