اسلام آباد۔ 10جنوری (اے پی پی) پاکستان مسلم لیگ (ن) نا راہشون دانیا ل عزیز پارینے کہ پی ٹی آئی عدالت نا مون آ امنا کرینے کہ وزیراعظم محمد نواز شریف نا پن پاناما پیپراٹی اسہ جاگہ اس ہم اف۔ الس تحریک انصاف ئِ ضمنی، بلدیاتی ، کنٹونمنٹ ، کشمیر و گلگت بلتستان نا گچین کاری تیٹی مسترد کرینے۔ سے شنبے آ سپریم کورٹ نا پیشن میڈیا تون ہیت وگپ کرسا اوپارے کہ عدالت نا مون آ پی ٹی آئی نا وکیل نعیم بخاری پارے کہ اصل وکیل حامد خان ئس ہرا نرانے۔ اوپارے کہ عمران خان پائک کہ ننا کاریم دوبہ خلنگ ئس شاہدی اتنگ ادارہ غاتا کاریم ئِ۔ دانیال عزیز پارے کہ وزیراعظم ئِ پاکستان نا الس وونٹ ترسا گچین کرینے و واک آتے تسنے ہراتا رداٹ او تینا فرض ئِ انجام تننگ ئِ۔ دانیال عزیز پارے کہ الس پی ٹی آئی ئِ گچین کاری تیٹی مسترد کرینے وخت اس کہ وزیراعظم نواز شریف ئِ مینڈیٹ تسنے۔ پاکستان مسلم لیگ (ن) نا کارندہ غاک اودے پارٹی صدر گچین کرسا تینا است انا دھڑکن گوندانو۔ مسلم لیگ (ن) ئِ وونٹ تروک آ الس وزیراعظم محمد نواز شریف نا سروکی ٹی پاکستان ئِ مون آ ہِننگ آ ہُننگ خوارہ۔ اوپارے کہ پی ٹی آئی نا کنڈآن دوبہ غاتا گوازی بیرہ و بیرہ السی است خواہی تے مسخ کننگ کن کننگ انگ ئِ۔ داکان مست دھرنہ ترسا چین نا صدر نا دورہ منسوخ کرفنگ نا کوشست کننگا ہراڑآن پاکستان نا ارب آ روپئی تا نسخان مس۔ دانیال عزیز پارے کہ کے پی کے وزیراعلیٰ چین نا دورہ کرسا سی پیک ڈٹ ئِ امنا کرینے۔ اوپارے کہ پی ٹی آئی الس نا نظراٹی (ن) لیگ نا حکومت نا اہمیت ئِ کم کننگ کن کیہی حربہ غاتے کاریم اٹ اتنگ ئِ ہرانا نسخان پارلیمنٹ و الیکشن کمیشن تون اوار غٹ ادارہ غاتے مننگ ئِ ۔ اوپارے کہ عمران خان دل برداشتہ مسنے۔ مسلم لیگ (ن) نا راہشون پارے کہ پی ٹی آئی عدالت نا مون آامنا کرینے کہ وزیراعظم نواز شریف نا پن پاناما پیپراٹی جاگہ اس ہم اوار اف۔ اوپارے کہ ننا پورو است جم ئِ کہ ہراتم ننا وکیل ئِ دلیل تننگ نا موقع ملا تو پی ٹی آئی ئِ شکست نا مون تروئی تمک۔
