وزیراعظم 14اگست آ پوسکن آ اسلام آباد بالی پٹ اتون اوار اوار پوسکن آ میٹروبس سروس نا بنائِ کیک
اسلام آباد۔ 10جنوری (اے پی پی) وزیراعظم محمد نواز شریف بنجائی دارالحکومت اٹی پشاور موڑآن نیواسلام آباد بالی پٹ اسکان پوسکن ئُ میٹروبس اسے نا دمدستی جوڑ جاڑ نا پارت کرینے وخت اس کہ او 14اگست آ پوسکن آ اسلام آباد بالی پٹ اتون اوار اوار پوسکن آ میٹروبس سروس نا بنائِ کیک۔ وزیراعظم تون سیکرٹری مواصلات ڈویژن و چیئرمین این ایچ اے شاہد اشرف تارڑ سے شنبے آ وزیراعظم ہاﺅس اٹی اوڑدہی کرے و اودے ملک اٹی برجاءشاہراتی ڈٹ آتیا پیش رفت نا بارواٹی معلومدار کرے۔ داوخت آ وزیراعظم پارے کہ ملک انا اجتماعی راجی و اقتصادی شونداری و مرمر انگا علاقہ غاتے آسان رسینگ فراوان کننگ کن روڈ آتا جال المی ئِ ہراڑآن واپار و معاشی سرجزآتے کن بھلو اقتصادی وارخواہی اس ودی مریک۔ وزیراعظم پشاور موڑ ئِ نیو اسلام آباد بالی پٹ تون ملفوک آ اسلام آباد میٹروبس لنک انا دمدستی جوڑجاڑ نا ہم پارت کرے۔ وزیراعظم ئِ پاننگاکہ دا ڈٹ آ کم و ود 18 ارب روپئی خڑچ بریک و داروٹ آ 14بس اسٹاپ مریک۔ وزیراعظم 14اگست آ پوسکن آ اسلام آباد بالی پٹ تون اوار اوار پوسکن آ میٹرو بس سروس نا ہم بنائِ کیک ہراڑآن مسافر تے آرام دہ سفر نا آسراتی دوبریک و اوفتا نہادی وخت بچک۔ وزیراعظم پارت کرے کہ پوسکن آ اسلام آباد بالی پٹ کن میٹرو بس سروس پوسکن انگا آسودہی تیان بایدے آراستہ مرے و دانا کاریم و خذمت آتیا ہچ وڑاسے ٹی ہچ وڑنا سمجھوتہ کننگپ۔ اوڑدہی ٹی وزیراعظم نا سیکرٹری و ایلو کمامدارآک ہم ساڑی ئسر۔
