اسلام آباد۔ 18 ستمبر (اے پی پی) وزیراعظم عمران خان پارینے کہ کیہی نسل آتیان کراچی ٹی رہینگوک آ بنگلہ دیشی مہاجر آتا معاملہ انسانی حق انا ویل ءِ ننے اوفتا بارواٹ اٹ فیصلہ کروئی مریک داڑکن غٹ کڑدہ غاتون سلابت کینہ۔ سے شنبے نادے قومی اسمبلی ٹی اخترمینگل نا کنڈآن اعتراضی ٹک آ وزیراعظم نا کراچی نا دورہ نا وخت آ بنگلہ دیشی مہاجر آتے شہریت تننگ نا بابت بیان نا معاملہ ءِ چست کننگا ہرانا ورندی ٹی وزیراعظم عمران خان پارے کہ 1951ء نا کانود نا رداٹ ہرا چنا پاکستان اٹی ودی مریک اونا حق ءِ کہ اودے داجاگہ نا شہریت تننگے۔ دابیرہ پاکستان اٹی آخا بلکن یورپ تون اوار ایلو ملک آتے ٹی ہم ہنداکانود ءِ۔ اوپارے کہ عارضی وڑاٹ ہجرت کرسا بروک آ مہاجر آتے کن پین کانود اسے ہرا پنجا پنجا سال آن کراچی ٹی رہینگ انگ ءُ، و اوفتا چناک ہم داڑے ودی مسنو اوفتے پاکستان نا شہریت ملپننگ ءِ۔ اوفتا استحصال مننگ ءِ۔ ای ہرا ہیت ءِ کریسٹ او بیرہ کراچی کن ئس۔ اوفتے نئے تو نن شہریت تسونن و نئے دا پدی ہِننگ کیرہ نئے نن اوفتے ملک آن پیشن گدریفنگ کینہ۔ اوپاکستان نا شاری افس ہنداخاطرآن اوفتا استحصال ءِ کننگک ہراڑے لس پاکستانی ءِ 20 ہزار اٹی نوکری تننگک اوفتے 10 ہزار روپئی ٹی تخنگک۔ وزیراعظم پارے کہ او انسانیت نا تقاضہ نا بناء آ داپاننگ ءِ کہ دابندغ آک ہم انسان ءُ۔ اگہ نن اوفتا بابت اینو فیصلہ کپنی تو ہراوخت کینہ۔ ہراچناداڑے ودی مس و بھلن مس واو ہرانگ کاہک۔ وزیراعظم پارے کہ جہانی کنونشن نا رداٹ مہاجر آتے زبردستی اوفتا ملک آتے ٹی گدریفنگ مفک۔ نن اوغان مہاجر آتا وطن آ پدی ہِننگ کن اقوام متحدہ نا ہائی کمشنر مہاجر ین تون اواری اٹ رضاکارانہ بنداو تیا کاریم کننگ اُن۔ وزیراعظم پارے کہ ہرامہاجر آک داڑے برام کرینو داڑے او سیٹل مسنو اوفتا بارواٹ فیصلہ کروئی تمک۔ داانسانی حق انا ویل اسے۔ اوپارے کہ داسکان نن دابابت ہچ ءُ حتمی فیصلہ اس کتنون۔ فیصلہ کننگ آن مست غٹ کڑدہ غاتون سلابت کینہ۔ اوپارے کہ داچرجوئی ٹی سلاہ ہم تننگک۔
