ملک اٹی جمہوریت نا سوگوی و کانود نا حکمرانی کن شفاف گچین کاری تا اڈ تننگ اہم ءِ ، لس گچین کاری 2018 ء نا بابت معاملہ غاتا پٹ وپول کن قومی اسمبلی نا خصوصی کمیٹی نا جاگہ غا ہڑتوم آ ایوان تا باسک آتیا تالان بایدے پارلیمانی کمیشن اس جوڑ مرے

اسلام آباد۔ 19 ستمبر (اے پی پی) سینیٹ نا باسک آک پارینو کہ ملک اٹی جمہوریت نا سوگوی و کانود نا حکمرانی کن شفاف گچین کاری تا اڈتننگ اہم ءِ۔ لس گچین کاری 2018 ء نا بابت معاملہ غاتا پٹ وپول کن قومی اسمبلی نا خصوصی کمیٹی نا جاگہ غا ہڑتوم آ ایوان تا باسک آتیا تالان بایدے پارلیمانی کمیشن اس جوڑ مرے۔ چارشنبے نادے ایوان بالا ٹی لس گچین کاری 2018 ء نا بابت قائمہ کمیٹی داخلہ نا رپورٹ آ خیال آتا درشانی ءِ کرسا بلوچستان نیشنل پارٹی (مینگل ) نا باسک ڈاکٹر جہانزیب جمالدینی پارے کہ پارلیمانی کمیشن ہی لس گچین کاری تا بابت معاملہ غاتا سہی چھان بین ءِ کننگ کیک، داڑآن بیدس ننا گڑتیک مرمفسہ۔ اوپارے کہ ایوان بالا بنجانا نمائندگی ءِ کیک، اودے ہم لس گچین کاری تیان مست معاملہ غاتا چھان بین نا عمل اٹی بایدے شریک کروئی مرے۔ سینیٹر محمد علی سیف پارے کہ لس گچین کاری تا بابت قائمہ کمیٹی داخلہ نا رپورٹ بھاز اہم ءِ و داچرجوئی ٹی گچین کاری تا بابت معاملہ غاتا چھان بین کن اواری اٹ کاریم کننگ نا گرج ءِ۔ پارلیمانی کمیشن نا جوڑ کننگ غٹ پارلیمانی سیاسی جماعت آتا سلابت اٹ بایدے مرے و ہڑتوم آ ایوان تا بایدے نمائندگی مرے۔ سینیٹر عتیق شیخ پارے کہ ننا خواست ءِ کہ لس گچین کاری تا بابت غٹ حق آک بایدے مون آ بریر۔ دا چرجوئی ٹی حکومت و اپوزیشن پارلیمانی کمیشن نا جوڑ کننگ کن ہڑتوم آ ایوان تے اوار ہلسا کائے و ہڑتوم آ ایوان تا داٹی بایدے نمائندگی مرے۔ سینیٹر محمد اکرم پارے کہ بلوچستان ناالس احساس محرومی تا گواچی ءِ، اوفتے اوفتا حق بایدے تروئی مرے۔ لس گچین کاریک ہراوخت اسکان شفاف و صاف مفسہ ، ملک اٹی سیاسی سوگوی ودی مفک۔ سینیٹر میر کبیر پارے کہ الس نا حقی نمائندہ ہی الس نا ویل آتے ایسر کننگ کیک۔ لس گچین کاری تیا ننا بھاز گڑتی ءِ، گچین کاریک شفاف مفسہ تو ملک اٹی جمہوریت امر سوگو مریک۔