اسلام آباد۔ 05جنوری (اے پی پی) پاکستان مسلم لیگ(ن) نا راہشون دانیا ل عزیز پارینے کہ تحریک انصاف نا وکیل نعیم بخاری عدالت نا مون آامنا کرینے کہ اونا موقف نزور ئِ۔ پنچ شنبے آ سپریم کورٹ اٹی پاناما پیپر کیس نا سماعت آن پد میڈیا تون ہیت وگپ کرسا اوپارے کہ عدالت نا مون آ نعیم بخاری پاریسس کہ اگہ اخباری تراشہ کاریم اٹ اتنگے تو اونا لیسن ئِ کینسل کننگک۔ اوپارے کہ ہیت ہموکان ہموڑے کہ نے عمران خان نا موقف اخباری تراشہ غاتیان مون آہِننگ کتو۔ وکیل نعیم بخاری لندن فلیٹ نا بابت برطانوی اخبار گارڈین نا اخباری تراشہ غاتے پیش کرے ہراڑآ عدالت پارے کہ دوبہ غاتا بابت شاہدی پیش کننگے و پی ٹی آئی نا ورندی ئس کہ ہنداشاہدیک ئُ مسلم لیگ (ن) نا راہشون پارے کہ تدوک آدے عمران خان تینٹ عدالت نا مون آ بیان ترسا پارے کہ اونا کاریم دوبہ خلنگ ئِ و داڑآن ثابت مریک کہ عمران خان اصل اٹی قلابازی خان ئِ۔ دانیال عزیز پارے کہ اینو ہم ہیت ہموکان ہموڑے کے نے عمران خان نا موقف اخباری تراشہ غاتیان مون آ ہِننگ کتنے۔ عمران خان خیبرپختونخوا ٹی احتساب کمیشن نا سروک ئِ فارغ کرے و اسہ پوسکن ئُ کانود اس پیش کرے کہ اگہ ڈوہ آ کیس 120 دے آن پد چلینگے تو امنا کننگے کہ پنداردوبہ بے قصور ئِ۔ دانیال عزیز پارے کہ اگہ ہندا کانود ئِ احتساب کیس آتیا لاگو کننگے تو ہزار آ کیس آک تینٹ چٹرہ۔ دانیال عزیز مستی پارے کہ پی ٹی آئی نا وکیل آک امنا کریر کہ ہرااوفک ہرا شاہدی تے پیش کرینو او مسخرہ ئُ۔ اوپارے کہ عدالت نا کنڈآن التوفیق کیس نا بابت سوج آ نعیم بخاری تون ہچ ئُ ورندی اس ہلوکہ۔ نعیم بخاری لندن فلیٹ نا بابت برطانوی اخبار نا خبر ئِ پیش کرے۔ عدالت واروار پاننگ ئِ کہ شاہدی پیش کننگے۔ اوپارے کہ داہیت آن دا ثابت مریک کہ پی ٹی آئی نا غٹ دوبہ غاک محض پروپیگنڈہ ئسر۔ دانیال عزیز پارے کہ دوبہ غاتا چرجوئی بایدے بند مرے و صاف شفاف احتساب اس بایدے کننگے۔
