اسلام آباد۔ 05جنوری (اے پی پی) وزیراعظم نا سلاہکار خارجہ سرتاج عزیز جہانی برادری آ زورشاغانے کہ مقبوضہ کشمیر نا کودک و معصوم شاری تیا بھارتی بیدادی ئِ بند کرفنگ تون اوار دا ویل ئِ پرامن و سیاسی ایسر کرفنگ اٹی تینا کڑد ئِ ادا کے، پاکستان ہمیشہ کشمیری تا سیاسی، سفارتی و اخلاقی مخ تفی ئِ کرینے ہرا پین وخت اس ہم برجاءتخنگک۔پنچ شنبے آ داڑے ینگ پارلیمنٹرین فورم نا کنڈآن کشمیر نا بابت اِرادے ئی جہانی پارلیمنٹری سیمینار نا بنائی دود آن تران کرسا اوپارے کہ اقوام متحدہ نا ایجنڈہ غا کشمیر نا ویل و فلسطین داوخت اسکان ایسرنا چاری ئُ ، دا چرجوئی ٹی سلامتی کونسل نا قراردادآک ہم ساڑی اریر۔ اوپارے کہ کشمیرنا ویل انا بابت کشمیری تا مسہ نسل آتا قربانی مچ آ دنیا نا مون آٹی ئُ، 7لکھ بھارتی فوج انا مقبوضہ کشمیر اٹی ساڑی گری و اوفتا کودک و معصوم کشمیری تیا بیدادی ئِ ہر فورم آ تالان کننگ کن پاکستان تینا کڑد ئِ ادا کننگ ئِ۔ اوپارے کہ 2جولائی 2016ءآ برہان وانی نا شہیدی کشمیری تا جہد آجوئی نا اہم موڑاس جوڑ مسنے اوکان گڈ بھارتی فوج جہد آجوئی ٹی اختہ کشمیری تیا بیدادی ئِ کاٹم آن گدریفینے۔ پیلٹ گن آتا کاریم اٹ اتنگ آن ہزار آ کشمیری ورنابینائی آن محروم مسنو و داوخت اسکان جہد آجوئی نا بابت جان تا ندرانہ ئِ پیش کننگ نا کچ مقبوضہ کشمیر اٹی ایلو ہراہم جہد آجوئی نا مقابلہ ٹی بھاز زیات ئِ۔ اوپارے کہ پاکستان و بھارت نا نیام اٹ کشمیر نا ویل اسہ بنداوی ئُ معاملہ اسے، وزیراعظم محمد نواز شریف اقوام متحدہ نا جنرل اسمبلی ٹی دا ویل ئِ پبی وڑاٹ تالان کننگانے۔ اوپارے کہ پاکستان ہمیشہ کشمیری تا حق خودارادیت نا مخ تفی ئِ کرینے نن پین وخت اس ہم کشمیری تا سیاسی ، سفارتی و اخلاقی مخ تفی ئِ برجاتخنہ۔ اوپارے کہ جہانی برادری ئِ بایدے مرے کہ کشمیر نا ویل انا سیاسی و پرامن ایسرکشنگ اٹی تینا کڑد ئِ ادا کیر۔
